ඇමරිකානු ජනාධිපති ඩොනල්ඩ් ට්රම්ප් කැනේඩියානු නිෂ්පාදන මත පනවා ඇති 50% තීරුබදුවලට ප්රතිචාර දක්වමින්, එක්සත් ජනපදයෙන් ආනයනය කරන භාණ්ඩ කිහිපයකට සමාන මට්ටමේ තීරුබදු පැනවීමට කැනඩාව තීරණය කර තිබේ.
කැනේඩියානු අගමැති මාර්ක් කානි සෙනසුරාදා මේ බව ප්රකාශ කළ අතර, නව ප්රතිප්රහාරාත්මක තීරුබදු සැප්තැම්බර් 8 සිට ක්රියාත්මක කිරීමට නියමිතය.
කානි සඳහන් කළේ ඇමරිකාවෙන් ආනයනය කරන වානේ, ඉලෙක්ට්රොනික උපකරණ සහ තවත් භාණ්ඩ සඳහා “ඩොලරයට ඩොලරයක්” ලෙස මෙම තීරුබදු පනවන බවයි.
“කැනේඩියානු කම්කරුවන්, ගොවීන්, පවුල් සහ ව්යාපාර ආරක්ෂා කිරීම සඳහා වොෂින්ටනයේ නව තීරුබදුවලට ඩොලරයට ඩොලරයක් ලෙස ප්රතිචාර දක්වනවා,” යැයි කානි පැවසීය.
ඇමරිකාව සහ කැනඩාව අතර දින තුනක් පුරා පැවති දැඩි වෙළෙඳ සාකච්ඡා සිකුරාදා එකඟතාවයකින් තොරව අවසන් වීමෙන් පසුව මෙම තත්ත්වය උග්ර වී තිබේ. දෙපාර්ශ්වයම සාකච්ඡා බිඳවැටීමට අනෙක් පාර්ශ්වය වගකිව යුතු බවට චෝදනා කර ඇත.
ට්රම්ප්ගේ නව තීරුබදු යටතට කැනඩාවෙන් ඇමරිකාවට අපනයනය කරන වයින්, ගෘහ භාණ්ඩ, කිරි නිෂ්පාදන, සිමෙන්ති, ඇඳුම්, ධීවර උපකරණ සහ හොකී උපකරණ ඇතුළු භාණ්ඩ රැසක් ඇතුළත් වන අතර, එය ඇමරිකාවට සිදුකරන කැනේඩියානු අපනයනවලින් ඩොලර් බිලියන 20කට පමණ බලපායි.
මෙම තීරුබදු තුන්රට අතර පවතින USMCA නිදහස් වෙළෙඳ ගිවිසුම යටතේ මෙතෙක් ආරක්ෂාව ලැබූ කැනේඩියානු නිෂ්පාදනවලටද බලපාන බව වාර්තා වේ.
කානි පැවසුවේ දෙරට අතර වෙළෙඳ ගිවිසුමක් ඇති කර ගැනීමේ අවසන් අදියරේදී ඇමරිකානු පාර්ශ්වය ඉදිරිපත් කළ නව කොන්දේසි කැනඩාවට අසාධාරණ සහ ආර්ථික වශයෙන් අවාසිදායක වූ බවයි.
“ඔවුන් ඉදිරිපත් කළ දේ අපට පිළිගත නොහැකියි. ඔවුන් ඉල්ලා සිටි දේ අප ලබා දෙන්නේද නැහැ,” යැයි ඔහු පැවසීය.
වෙළෙඳ යුද්ධයක් ආරම්භ වී ඇත්දැයි විමසූ විට කානි පැවසුවේ, “ඔබට පහර දුන් විට ඔබ සිටින්නේ යුද්ධයකයි. අපට පහර දී තිබෙනවා,” යනුවෙනි.
කැනඩාව ප්රතිප්රහාරාත්මක තීරුබදු පනවන්නේ එක්සත් ජනපද වානේ, කිරි නිෂ්පාදන, විදුලි උපකරණ, කෘෂිකාර්මික යන්ත්රෝපකරණ, කඩදාසි සහ පල්ප් නිෂ්පාදන, ඉලෙක්ට්රොනික භාණ්ඩ ඇතුළු අංශ කිහිපයකටය.
කැනේඩියානු රජය මෙම තීරුබදු හේතුවෙන් බලපෑමට ලක්වන කර්මාන්ත සඳහා සහන වැඩසටහන් ලබන සතියේ ප්රකාශයට පත් කිරීමටද නියමිතය. එම සහන ක්රියාමාර්ග වසර කිහිපයක් පුරා ක්රියාත්මක විය හැකි බව කානි සඳහන් කළේය.
කැනඩාවේ අපනයනවලින් සියයට 70කට ආසන්න ප්රමාණයක් ඇමරිකානු වෙළෙඳපොළ මත රඳා පවතින බැවින්, නව තීරුබදු කැනේඩියානු ආර්ථිකයට සැලකිය යුතු බලපෑමක් එල්ල කළ හැකි බව වෙළෙඳ විශේෂඥයෝ පෙන්වා දෙති.
කැනඩාවේ දැව, වයින් සහ මෝටර් රථ නිෂ්පාදන ඇතුළු කර්මාන්තවලට දැඩි බලපෑමක් එල්ල වී රැකියා අහිමිවීම් සහ ව්යාපාර වසා දැමීම් සිදුවිය හැකි බවද අනතුරු අඟවා තිබේ.
මේ අතර, කැනඩාවේ ඔන්ටාරියෝ ප්රාන්ත අගමැති ඩග් ෆෝඩ් කානිගේ තීරණයට සහාය පළ කරමින්, ඇමරිකාව සමඟ ඇති කර ගැනීමට යෝජනා වූ ගිවිසුම ඔන්ටාරියෝහි මෝටර් රථ, වානේ සහ නිෂ්පාදන කර්මාන්තවලට අවාසිදායක වනු ඇති බව පැවසීය.
දෙරට අතර සාකච්ඡාවල ප්රධාන මතභේදයක් වී ඇත්තේ මෝටර් රථ සඳහා පනවන තීරුබදුය. කැනඩාව සැහැල්ලු වාහන සඳහා යෝජිත සහන මධ්යම හා බර වාහන සඳහාද ලබාදෙන ලෙස ඉල්ලා තිබුණද, ඇමරිකාව ඊට විරෝධය පළ කර තිබේ.
මෙම තත්ත්වය හේතුවෙන් දීර්ඝ කාලයක් තිස්සේ සමීප මිත්ර රටවල් සහ ප්රධාන වෙළෙඳ හවුල්කරුවන් වූ ඇමරිකාව සහ කැනඩාව අතර සබඳතා තවදුරටත් උණුසුම් වී තිබේ.
