දිනමිණ පුවත්පත වාර්තා කරන පරිදි, පාරිභෝගික අවශ්‍යතා ඉහළ යාමට සරිලන ලෙස ගෑස් බෙදාහැරීම කඩිනම් කිරීමට අවශ්‍ය පියවර ගෙන ඇති බව සමාගම සඳහන් කර තිබේ.
ලිට්‍රෝ ගෑස් ලංකා සමාගමට අනුව, ගෑස් මෙට්‍රික් ටොන් 3,900ක් රැගත් GOODWILL නෞකාව ඔක්තෝබර් 24 වැනිදා ශ්‍රී ලංකාවට පැමිණ තිබේ. ඊට අමතරව ඔක්තෝබර් 22 වැනිදා තවත් ගෑස් තොගයක් මෙරටට පැමිණ ඇති අතර, තවත් ගෑස් තොගයක් අද (26) පැමිණීමට නියමිතය.
ඔක්තෝබර් 22 වැනිදා ලැබුණු ගෑස් මෙට්‍රික් ටොන් 3,900ක තොගය යොදා ගනිමින් ඔක්තෝබර් 23 සිට 25 දක්වා කාලය තුළ ගෘහස්ථ ගෑස් සිලින්ඩර 350,000ක් දිවයින පුරා බෙදාහැරීමට සැලසුම් කර තිබූ බව ද සමාගම වැඩිදුරටත් සඳහන් කළේය.
ඉදිරි දින කිහිපය තුළ වෙළෙඳපොළේ ප්‍රමාණවත් ගෑස් තොග පවතිනු ඇති බවට ලිට්‍රෝ ගෑස් ලංකා සමාගම සහතික වී තිබේ. ඒ අනුව, ගෘහස්ථ ගෑස් සිලින්ඩර මිලදී ගැනීමේදී හිඟයකට මුහුණ දීමට පාරිභෝගිකයන්ට සිදු නොවනු ඇති බව සමාගම පවසයි.
