ශ්රී ලංකා මහජන සෞඛ්ය සේවාවේ ශත සංවත්සර සැමරුම් උත්සවය ජනාධිපති අනුර කුමාර දිසානායක මහතාගේ ප්රධානත්වයෙන් කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලාවේදී (BMICH) පැවැත්විණි.
ශ්රී ලංකාවේ මහජන සෞඛ්ය සේවාව ආරම්භ වූයේ 1926 වසරේදී දකුණු ආසියානු කලාපයේ පළමු ක්ෂේත්ර සෞඛ්ය ඒකකය ලෙස කළුතර ජාතික සෞඛ්ය ඒකකය පිහිටුවීමත් සමඟය. අද වන විට එය වෛද්ය නිලධාරී සෞඛ්ය (MOH) කොට්ඨාස 362කට අධික සංඛ්යාවකින් සමන්විත පුළුල් ජාලයක් බවට වර්ධනය වී ඇති අතර, මහජන සෞඛ්ය කණ්ඩායම් එහි ප්රධාන පදනම ලෙස ක්රියා කරයි.
වෛද්ය නිලධාරී සෞඛ්යවරුන් (MOH), මහජන සෞඛ්ය පවුල් සෞඛ්ය සේවිකාවන් (PHM) සහ මහජන සෞඛ්ය පරීක්ෂකවරුන් (PHI) ඇතුළු ක්ෂේත්ර නිලධාරීන් මෙම කණ්ඩායම් තුළ ඉතා වැදගත් කාර්යභාරයක් ඉටු කරති. ප්රජාව සමඟ සෘජු සම්බන්ධතා ගොඩනඟා ගනිමින් සහ ජනතා විශ්වාසය දිනාගනිමින් ඔවුන් මෙරට සෞඛ්ය පද්ධතියේ පරිවර්තනීය වෙනසකට දායක වී ඇත.
ශ්රී ලංකා ප්රජා වෛද්ය විද්යා විද්යාලය විසින් සංවිධානය කළ මෙම සැමරුම් උත්සවයේදී පසුගිය ශත වර්ෂය පුරා මෙරට ප්රාථමික සෞඛ්ය සේවාව දියුණු කිරීම සඳහා විශිෂ්ට සේවාවක් ඉටු කළ ප්රජා සෞඛ්ය වෘත්තීය කණ්ඩායම් 36ක් ඇගයීමට ලක් කෙරිණි.
ජනාධිපතිවරයාගේ ප්රධානත්වයෙන් ශත සංවත්සර සැමරුම් ප්රකාශනයක් සහ ශ්රී ලංකාවේ ප්රජා සෞඛ්ය සේවාවේ අනාගත දිශානතිය පැහැදිලි කරන ධවල පත්රිකාවක් ඇතුළු ප්රකාශන කිහිපයක් ද එළිදක්වන ලදී.
උත්සවයේදී අදහස් දක්වමින් සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස මහතා පැවසුවේ, මහජන සෞඛ්ය සේවාව යනු අභිමානවත් ඉතිහාසයක්, ජනතා විශ්වාසය දිනාගත් වර්තමානයක් සහ බලාපොරොත්තු සහගත අනාගතයක් සහිත ක්ෂේත්රයක් බවයි.
මාතෘ සෞඛ්ය ක්ෂේත්රයේ සිදු කළ මැදිහත්වීම් හේතුවෙන් මාතෘ මරණ සංඛ්යාව 2,500 සිට 25ක් පමණ දක්වා අඩු කිරීමට ශ්රී ලංකාව සමත් වූ බව අමාත්යවරයා පෙන්වා දුන්නේය.
එමෙන්ම, සජීවී උපත් 1,000කට ළදරු මරණ 200ක් පමණ පැවති තත්ත්වය පහත් කරමින් එය 5ත් 6ත් අතර මට්ටමකට ගෙන ඒමට හැකි වූ බවත්, වරක් මරණ 100,000කට හේතු වූ මැලේරියා රෝගය මෙරටින් තුරන් කිරීමට හැකි වූ බවත් ඔහු සඳහන් කළේය.
මෙම ජයග්රහණ පමණක් වුවද ශ්රී ලංකාවේ ප්රජා සෞඛ්ය ක්ෂේත්රයේ ලබා ඇති ප්රගතියේ විශාලත්වය පෙන්වන බව අමාත්යවරයා පැවසීය. අඩු සහ මධ්යම ආදායම් රටක් ලෙස ඉහළ ගුණාත්මකභාවයකින් යුතු ප්රජා සෞඛ්ය සේවාවක් පවත්වාගෙන යා හැකි ආකාරය පෙන්වන සුවිශේෂී ආකෘතියක් ශ්රී ලංකාව නිර්මාණය කර ඇති බවද ඔහු සඳහන් කළේය.
මෙම ජයග්රහණ සෞඛ්ය සේවකයන්ගේ කැපවීම හේතුවෙන් ලබාගත හැකි වූ බව පෙන්වා දෙමින් අමාත්යවරයා ඔවුන්ගේ සේවයට සිය කෘතඥතාව පළ කළේය. මෑතකාලීන වසංගත තත්ත්වයන් සහ ආපදා අවස්ථාවලදී ප්රජා සෞඛ්ය සේවකයන් දැක්වූ අතිමහත් කැපවීමද ඔහු අගය කළේය.
මෙම අවස්ථාවට එක්වූ ශ්රී ලංකාවේ එක්සත් ජාතීන්ගේ නේවාසික සම්බන්ධීකාරක සහ ලෝක සෞඛ්ය සංවිධානයේ නියෝජිත වෛද්ය රාජේෂ් සම්බාජිරාඕ පාණ්ඩව් මහතා පැවසුවේ, ඉදිරි ශත වර්ෂය සඳහා ගමන් කරන ශ්රී ලංකාවට අතීත ජයග්රහණ පමණක් පවත්වාගෙන යාම ප්රමාණවත් නොවන බවයි.
බෝ නොවන රෝග, වයස්ගත වන ජනගහනය, මානසික සෞඛ්ය අවශ්යතා, දේශගුණික අවදානම් සහ නව වසංගත තර්ජන වැනි අභියෝග හේතුවෙන් ශ්රී ලංකාවේ සෞඛ්ය අවශ්යතා වේගයෙන් වෙනස් වෙමින් පවතින බව ඔහු පෙන්වා දුන්නේය.
අහිතකර ආහාර පුරුදු, ශාරීරික ක්රියාකාරකම් හිඟය සහ මත්පැන් භාවිතය වැනි සාධක හේතුවෙන් බෝ නොවන රෝග ඉහළ යමින් පවතින බවද වෛද්ය පාණ්ඩව් මහතා සඳහන් කළේය. මෙම අවදානම් තනිවම ඇති නොවන අතර ඒවා සමාජ, ආර්ථික සහ පාරිසරික සාධක මගින් හැඩගැසෙන බවද ඔහු පැවසීය.
ශ්රී ලංකාවේ තිරසාර සංවර්ධනය සහ ජනතාවගේ යහපැවැත්ම සහතික කිරීම සඳහා එක්සත් ජාතීන්ගේ සංවිධානය සහ සංවර්ධන හවුල්කරුවන් අඛණ්ඩව සහාය ලබාදෙන බවද ඔහු සඳහන් කළේය.
සෞඛ්ය අමාත්යාංශයේ ලේකම් වෛද්ය අනිල් ජාසිංහ මහතා පැවසුවේ, වත්මන් රජය ආරම්භ කළ “ආරෝග්යා” වැඩසටහන මගින් ප්රජා සෞඛ්ය ක්ෂේත්රයේ අනාගත දියුණුව සඳහා පැහැදිලි දැක්මක් ලබාදී ඇති බවයි.
ප්රජා සෞඛ්ය සේවාව සඳහා ප්රමාණවත් ආයෝජනයක් නොමැති බවට මීට පෙර අදහස් පළවුවද, ආරෝග්යා වැඩසටහන යටතේ එයට ඉහළම ප්රමුඛතාව ලබාදී ඇති බව ඔහු සඳහන් කළේය. එය සෞඛ්ය පද්ධතියේ පරිවර්තනයක්, වැඩි සමානාත්මතාවක් සහ තාක්ෂණය කාර්යක්ෂමව භාවිත කිරීමක් පිළිබිඹු කරන බවද ඔහු පැවසීය.
සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන මහතා, ශ්රී ලංකා ප්රජා වෛද්ය විද්යා විද්යාලයේ සභාපති විශේෂඥ වෛද්ය වින්දියා කුමාරපෙලි මහත්මිය සහ සර්වෝදය ව්යාපාරයේ සභාපති ප්රජා වෛද්ය විශේෂඥ වෛද්ය වින්යා ආරියරත්න මහතා ද මෙහිදී අදහස් දැක්වූහ.
හිටපු ජනාධිපති මෛත්රීපාල සිරිසේන මහතා, ක්රීඩා හා යෞවන කටයුතු අමාත්ය සුනිල් කුමාර ගමගේ මහතා, අධ්යාපන හා උසස් අධ්යාපන නියෝජ්ය අමාත්ය වෛද්ය මධුර සෙනෙවිරත්න මහතා, අමාත්යවරුන් සහ පාර්ලිමේන්තු මන්ත්රීවරුන්, අමාත්යාංශ ලේකම්වරුන්, සෞඛ්ය සේවා නියෝජ්ය අධ්යක්ෂ ජනරාල්වරුන්, පළාත් සහ ප්රාදේශීය සෞඛ්ය අධ්යක්ෂවරුන්, ශ්රී ලංකා ප්රජා වෛද්ය විද්යා විද්යාලයේ ලේකම් සන්තුෂ්යා ප්රනාන්දු මහත්මිය ඇතුළු සෞඛ්ය ක්ෂේත්රයේ විශේෂඥයන් සහ ලෝක සෞඛ්ය සංවිධානය, එක්සත් ජාතීන්ගේ සංවිධානය හා යුනිසෙෆ් ඇතුළු ජාත්යන්තර ආයතන නියෝජිතයෝ ද මෙම අවස්ථාවට එක්ව සිටියහ.
