ශ්රී ලංකාවේ විදුලි වාහන සඳහා නිකුත් කරනු ලබන කොළ පැහැති අංක තහඩු සම්බන්ධයෙන් ඇතැම් පොලිස් නිලධාරීන් අතර ප්රමාණවත් දැනුවත්භාවයක් නොමැති බවට මෝටර් රථ හිමියෙකු සමාජ මාධ්ය ඔස්සේ අවධානය යොමු කර තිබේ.
සමාජ මාධ්ය ඔස්සේ පළ කළ සටහනක ඔහු සඳහන් කර ඇත්තේ වැලිවේරිය ප්රදේශයේදී පොලිස් නිලධාරීන් විසින් තමන් නතර කර, තම විදුලි වාහනයේ ප්රදර්ශනය කර තිබූ කොළ පැහැති අංක තහඩුව සම්බන්ධයෙන් ප්රශ්න කළ බවයි.
ඔහුගේ ප්රකාශයට අනුව, විදුලි වාහන සඳහා කොළ පැහැති අංක තහඩු නිකුත් කරන බව සම්බන්ධයෙන් නිලධාරීන් මුලදී දැනුවත් නොවූ බවක් පෙනී ගොස් ඇති අතර, එම අංක තහඩුව නීත්යානුකූලව නිකුත් කළ එකක්ද යන්න පිළිබඳවද ඔවුන් විමසා තිබේ.
අදාළ අංක තහඩුව නිල වශයෙන් නිකුත් කළ එකක් බවත්, එය ලබාගැනීම සම්බන්ධයෙන් ලැබුණු පණිවිඩයක් සාක්ෂියක් ලෙස පෙන්වීමට හැකි වූ බවත් මෝටර් රථ හිමියා සඳහන් කර තිබේ.
කෙසේ වෙතත්, තමන් පොලිස් නිලධාරීන්ට දොස් නොපවරන බව පැවසූ ඔහු, වාහන ලියාපදිංචිය සහ අංක තහඩු සම්බන්ධයෙන් සිදුවන වෙනස්කම් පිළිබඳව පොලිස් ස්ථාන නිසි පරිදි දැනුවත් කිරීමට අදාළ බලධාරීන් පියවර ගත යුතු බව අවධාරණය කර ඇත.
එවැනි කරුණු සම්බන්ධයෙන් පුළුල් දැනුවත්භාවයක් ඇති කිරීමෙන් අනෙකුත් විදුලි වාහන හිමියන්ටද මෙවැනි අපහසුතාවලට මුහුණදීමට සිදුවීම වළක්වා ගත හැකි බවද ඔහු පෙන්වා දී තිබේ.
https://www.facebook.com/reel/1212171257773136
