ලෝක අමද්‍යප දිනය නිමිත්තෙන් අද (03) දිවයින පුරා සියලුම මත්පැන් අලෙවිසැල් වසා තැබෙන බව සුරාබදු දෙපාර්තමේන්තුව නිවේදනය කර තිබේ.
ඒ අනුව, වාර්ෂිකව ඔක්තෝබර් 03 වැනිදාට යෙදෙන ලෝක අමද්‍යප දිනය සැමරීම වෙනුවෙන් සෙනසුරාදා දිනයේ සියලුම මත්පැන් අලෙවිසැල් වසා තැබෙන බව එම දෙපාර්තමේන්තුව තහවුරු කළේය.
මත්පැන් භාවිතයෙන් වැළකී සිටීමේ වැදගත්කම පෙන්වාදීම, මත්පැන් භාවිතයේදී මධ්‍යස්ථභාවය ප්‍රවර්ධනය කිරීම සහ අමද්‍යප ව්‍යාපාරය පිළිබඳ මහජනතාව දැනුවත් කිරීම ලෝක අමද්‍යප දිනයේ ප්‍රධාන අරමුණු අතර වේ.
මේ අතර, ලොව පුරා වාර්ෂිකව පුද්ගලයන් මිලියන 3කට ආසන්න සංඛ්‍යාවක් මත්පැන් භාවිතය හේතුවෙන් මියයන බව වාර්තා වන අතර, එමගින් අහිතකර මත්පැන් භාවිතය සම්බන්ධ ගෝලීය සෞඛ්‍ය ගැටලුවේ බරපතළකමද අවධාරණය වේ.
