පොළොන්නරුව ජාතික වකුගඩු රෝහලේ පසුගියදා සිදුවූ පිපිරීමෙන් හානි වූ වාට්ටු දෙකක් ඉදිරි දින දෙක තුළ යළි විවෘත කිරීමට හැකි වනු ඇති බව සෞඛ්‍ය අමාත්‍යාංශ ලේකම් වෛද්‍ය අනිල් ජාසිංහ මහතා පවසයි.
එමෙන්ම රෝහලේ ශල්‍යාගාර සංකීර්ණය සහ දැඩි සත්කාර ඒකකයක්ද කඩිනමින් යළි ක්‍රියාත්මක කිරීමට හැකි වනු ඇතැයි ඔහු සඳහන් කළේය.
පිපිරීමෙන් රෝහලට සිදුවූ හානිය සම්බන්ධයෙන් සොයා බැලීම සඳහා වෛද්‍ය අනිල් ජාසිංහ මහතා බ්‍රහස්පතින්දා (01) පොළොන්නරුවේ චීන ශ්‍රී ලංකා මිත්‍රත්ව ජාතික වකුගඩු රෝග විශේෂිත රෝහලේ නිරීක්ෂණ චාරිකාවක නිරත වීමෙන් අනතුරුව මේ බව ප්‍රකාශ කළේය.
එහිදී ඔහු පිපිරීමෙන් හානි වූ රෝහල් මුළුතැන්ගෙය, ඊට යාබද පිරිමි සහ කාන්තා වාට්ටු සංකීර්ණ, ප්‍රධාන ශල්‍යාගාරය සහ වෛද්‍ය දැඩි සත්කාර ඒකකය පරීක්ෂා කළේය.
රෝහල් පාලනාධිකාරිය සහ වෛද්‍ය කාර්ය මණ්ඩලය සමඟ පැවති සාකච්ඡාවලින් අනතුරුව, හානි වූ වාට්ටු දෙකෙහි සුළු අලුත්වැඩියා කටයුතු කඩිනමින් අවසන් කර රෝගීන් ඇතුළත් කිරීම යළි ආරම්භ කිරීමට අවශ්‍ය පියවර ගන්නා ලෙස උපදෙස් ලබාදී තිබේ.
ශල්‍යාගාර සේවාද හැකි ඉක්මනින් යළි ආරම්භ කිරීම සඳහා ගත යුතු පියවර සම්බන්ධයෙන්ද එහිදී සාකච්ඡා කර ඇත.
පිපිරීම සිදුවූ දිනට පසුදිනම රුධිර පාරවිලයන සේවා යළි ආරම්භ කර තිබුණද, රෝහලට නේවාසික රෝගීන් ඇතුළත් කිරීම තවදුරටත් අත්හිටුවා ඇති බව සෞඛ්‍ය අමාත්‍යාංශ ලේකම්වරයා සඳහන් කළේය.
කෙසේ වෙතත්, ඩයලයිසිස් සේවා අඛණ්ඩව ක්‍රියාත්මක වන අතර, ශල්‍යකර්ම ඇතුළු අනෙකුත් අත්‍යවශ්‍ය සේවා ක්‍රමයෙන් යළි ආරම්භ කිරීමට අවශ්‍ය කටයුතු සිදු කෙරෙමින් පවතී.
මේ අතර, පිපිරීමෙන් සිදුවූ හානිය, විශේෂයෙන් රෝහලේ විදුලි පරිපථ සහ වෛද්‍ය වායු පද්ධතිවලට සිදුවූ හානිය පිළිබඳව තාක්ෂණික කණ්ඩායම් කිහිපයක් විමර්ශනය කරමින් සිටී.
සමහර අලුත්වැඩියා කටයුතු රෝහලටම සිදු කළ හැකි වුවද, ඇතැම් කටයුතු සඳහා විශේෂඥ තාක්ෂණික සහාය අවශ්‍ය වන බව වෛද්‍ය ජාසිංහ මහතා පැවසීය. ඒ අනුව අදාළ කොන්ත්‍රාත් ආයතන දැනටමත් ප්‍රතිසංස්කරණ කටයුතු සඳහා සම්බන්ධ කරගෙන තිබේ.
සෞඛ්‍ය අමාත්‍යවරයා සහ චීන තානාපතිවරයා අතර පසුගියදා පැවති සාකච්ඡාවලින් අනතුරුව, චීන ආධාර යටතේ ක්‍රියාත්මක හදිසි සහන යාන්ත්‍රණය හරහා සහාය ලබා ගැනීම සඳහා විදේශ සම්පත් දෙපාර්තමේන්තුව සමඟ සම්බන්ධීකරණ කටයුතු සිදු කෙරෙමින් පවතින බවද සෞඛ්‍ය අමාත්‍යාංශ ලේකම්වරයා අනාවරණය කළේය.
ශ්‍රී ලංකාවේ චීන අරමුදල් යටතේ ඉදිකර ඇති අනෙකුත් රෝහල් සඳහාද මෙවැනි නඩත්තු සහායක් ලබාදීමට චීන නියෝජිතයන් කැමැත්ත පළ කර ඇති බව වෛද්‍ය ජාසිංහ මහතා වැඩිදුරටත් සඳහන් කළේය.
පිපිරීම සම්බන්ධයෙන් සෞඛ්‍ය අමාත්‍යාංශය මඟින් සිදුකරන විමර්ශන ඇතුළු සියලු විමර්ශන අඛණ්ඩව සිදු කෙරෙන බවත්, ඒ අතරතුර රෝහලේ සේවා යළි යථා තත්ත්වයට පත් කරමින් අත්‍යවශ්‍ය වෛද්‍ය සේවා අඛණ්ඩව පවත්වාගෙන යාම සඳහා අවශ්‍ය පියවර ගනිමින් සිටින බවත් සෞඛ්‍ය අමාත්‍යාංශ ලේකම්වරයා අවධාරණය කළේය.
