ශ්‍රී ලංකාවේ රියැදුරු බලපත්‍ර 678,000කට ආසන්න සංඛ්‍යාවක් මේ වන විට මුද්‍රණය කිරීමට ඉතිරිව ඇති බව මෝටර් රථ ප්‍රවාහන දෙපාර්තමේන්තුවේ නිලධාරීහු අනාවරණය කළහ.
මූලික යටිතල පහසුකම් සහ උපායමාර්ගික සංවර්ධනය පිළිබඳ ආංශික අධීක්ෂණ කාරක සභාව හමුවේ නිලධාරීන් සඳහන් කළේ දැනට දිනකට රියැදුරු බලපත්‍ර 4,600ක් පමණක් මුද්‍රණය කළ හැකි බැවින්, පවතින හිඟය තවදුරටත් ඉහළ යමින් පවතින බවයි.
මෙම ප්‍රමාදය අවම කිරීම සඳහා නව මුද්‍රණ යන්ත්‍ර දෙකක් ඔක්තෝබර් 15 වැනිදා වන විට ස්ථාපනය කිරීමට අපේක්ෂා කරන බවද නිලධාරීහු පැවසූහ. එම යන්ත්‍ර ස්ථාපනය කිරීමෙන් පසු දිනකට රියැදුරු බලපත්‍ර 8,200ක් පමණ මුද්‍රණය කිරීමේ හැකියාව ලැබෙනු ඇතැයි ඔවුහු සඳහන් කළහ.
පාර්ලිමේන්තු මන්ත්‍රී එස්.එම්. මරික්කාර් මහතාගේ සභාපතිත්වයෙන් පැවති එම කාරක සභාව රියැදුරු බලපත්‍ර සහ වාහන අංක තහඩු නිකුත් කිරීමේ ප්‍රමාදයන් සම්බන්ධයෙන් විධිමත් විමර්ශනයක් සිදුකරන ලෙස නියෝග කර තිබේ.
ප්‍රමාදයන් ආරම්භ වූ ආකාරය, ඊට බලපා ඇති පරිපාලන සහ තාක්ෂණික කරුණු මෙන්ම අදාළ ටෙන්ඩර් සහ ප්‍රසම්පාදන ක්‍රියාවලිය පිළිබඳ සම්පූර්ණ වාර්තාවක් දින 45ක් ඇතුළත ඉදිරිපත් කරන ලෙස නිලධාරීන්ට උපදෙස් ලබාදී ඇත.
මේ අතර, 2026 මාර්තු 10 වැනිදායින් පසු ලියාපදිංචි කළ වාහන සඳහා අංක තහඩු මේ වන විට දින 14ක් ඇතුළත නිකුත් කරන බවද නිලධාරීහු කාරක සභාව හමුවේ සඳහන් කළහ.
මෝටර් රථ ප්‍රවාහන දෙපාර්තමේන්තුවේ උපකරණ සහ තාක්ෂණික පහසුකම් තවදුරටත් වැඩිදියුණු කිරීමේ අවශ්‍යතාවද කාරක සභාව අවධාරණය කළේය. අනාගතයේදී රාජ්‍ය සේවා සැපයීමේදී මෙවැනි ප්‍රමාදයන් ඇති නොවීමට අවශ්‍ය ක්‍රියාමාර්ග ස්ථාපිත කළ යුතු බවද කාරක සභාව පෙන්වා දුන්නේය.
