මුතුරාජවෙල සිට බණ්ඩාරනායක ජාත්‍යන්තර ගුවන්තොටුපළ (BIA) දක්වා ජෙට් A-1 ගුවන් ඉන්ධන ප්‍රවාහනය කිරීම සඳහා විශේෂ නළ මාර්ගයක් ඉදිකිරීම සහ නව ඉන්ධන ගබඩා ටැංකි පද්ධති දෙකක් ඉදිකිරීම ජනාධිපති අනුර කුමාර දිසානායක මහතාගේ ප්‍රධානත්වයෙන් ඊයේ (02) ආරම්භ කෙරිණි.
ජනාධිපති මාධ්‍ය අංශය සඳහන් කළේ ජාතික බලශක්ති යටිතල පහසුකම් ශක්තිමත් කිරීම, ඉන්ධන සැපයුම් ආරක්ෂාව වැඩිදියුණු කිරීම, ප්‍රවාහන වියදම් අවම කිරීම සහ අනාගත ගුවන් ඉන්ධන අවශ්‍යතා සපුරාලීමේ රජයේ වැඩපිළිවෙළ යටතේ ලංකා ඛනිජ තෙල් නීතිගත සංස්ථාව (CPC) සහ ලංකා ඛනිජ තෙල් තොග ගබඩා පර්යන්ත සමාගම (CPSTL) විසින් මෙම ව්‍යාපෘති ක්‍රියාත්මක කරන බවයි.
ගුවන් ඉන්ධන යටිතල පහසුකම් ව්‍යාපෘතිය යටතේ මුතුරාජවෙල ටැංකි සංකීර්ණයේ සිට කටුනායක බණ්ඩාරනායක ජාත්‍යන්තර ගුවන්තොටුපළ දක්වා ජෙට් A-1 ඉන්ධන සෘජුව ප්‍රවාහනය කිරීම සඳහා කිලෝමීටර් 21ක් දිගින් සහ අඟල් 10ක විෂ්කම්භයකින් යුත් භූගත නළ මාර්ගයක් ඉදිකිරීමට නියමිතය.
මෙම ව්‍යාපෘතියට ජෙට් A-1 ගුවන් ඉන්ධන ගබඩා කිරීම සඳහා නව ටැංකි 5ක් ඉදිකිරීමද ඇතුළත් වන අතර, ඒවායේ සමස්ත ගබඩා ධාරිතාව ඝන මීටර් 92,000කි.
ඒ යටතේ ඝන මීටර් 30,000 බැගින් ගබඩා කළ හැකි විශාල ටැංකි දෙකක්, ඝන මීටර් 15,000 බැගින් ගබඩා කළ හැකි මධ්‍යම ප්‍රමාණයේ ටැංකි දෙකක් සහ ඝන මීටර් 2,000ක ගුවන් ඉන්ධන ගබඩා කළ හැකි තවත් ටැංකියක් ඉදිකෙරේ.
විශේෂිත නළ මාර්ගය සහ ඊට අදාළ ගබඩා පහසුකම් මඟින් ගුවන් ඉන්ධන සැපයුමේ විශ්වසනීයත්වය වැඩිදියුණු කිරීමට මෙන්ම ප්‍රවාහන වියදම් අඩු කිරීමට හැකි වනු ඇති බව ජනාධිපති මාධ්‍ය අංශය සඳහන් කළේය. එමෙන්ම ශ්‍රී ලංකාවේ ගුවන් සේවා ක්ෂේත්‍රයේ අනාගත අවශ්‍යතා සපුරාලීමට ප්‍රමාණවත් ගබඩා ධාරිතාවක්ද මෙමඟින් සැපයෙනු ඇත.
ගුවන් ඉන්ධන නළ මාර්ගය සහ ටැංකි සංකීර්ණය ඉදිකිරීමේ ව්‍යාපෘතිය මාස 30ක් ඇතුළත අවසන් කිරීමට නියමිතය.
මේ අතර, CPSTL විසින් වෙනම ව්‍යාපෘතියක් යටතේ මුතුරාජවෙල පර්යන්තයේ නව පෙට්‍රෝලියම් ගබඩා ටැංකි 3ක් ඉදිකිරීමද ඊයේ ආරම්භ කර තිබේ.
එම නව ගබඩා පද්ධතියට ඝන මීටර් 15,000 බැගින් ධාරිතාවක් සහිත ටැංකි දෙකක් සහ ඝන මීටර් 10,000ක ධාරිතාවක් සහිත තවත් ටැංකියක් ඇතුළත් වේ. ව්‍යාපෘතිය අවසන් වූ පසු අමතර ඝන මීටර් 40,000ක පෙට්‍රෝලියම් ගබඩා ධාරිතාවක් එක්වනු ඇත.
රටේ පෙට්‍රෝලියම් ගබඩා යටිතල පහසුකම් තවදුරටත් ශක්තිමත් කිරීම සහ පුළුල් කිරීම, මෙහෙයුම් කටයුතු වඩාත් නම්‍යශීලී කිරීම මෙන්ම වර්ධනය වන ජාතික බලශක්ති අවශ්‍යතා සපුරාලීම සඳහා ඉන්ධන නිෂ්පාදන අඛණ්ඩව බෙදාහැරීම මෙම ව්‍යාපෘතියේ අරමුණු බව ජනාධිපති මාධ්‍ය අංශය සඳහන් කළේය.
CPSTL ගබඩා පුළුල් කිරීමේ ව්‍යාපෘතිය සඳහා මාස 18ක කොන්ත්‍රාත් කාලයක් ලබාදී ඇති අතර, එය 2028 අප්‍රේල් මාසයේදී අවසන් කිරීමට නියමිතය.
මෙම ව්‍යාපෘති දෙකම ක්‍රියාත්මක කිරීමෙන් මුතුරාජවෙල ප්‍රදේශයට නව ඉන්ධන ගබඩා ටැංකි 8ක් එක්වන අතර, ඒවායේ සමස්ත ගබඩා ධාරිතාව ඝන මීටර් 132,000ක් වනු ඇත.
අදාළ ජාත්‍යන්තර ප්‍රමිතීන් සහ පිළිගත් කර්මාන්ත ක්ෂේත්‍රයේ හොඳම භාවිතයන්ට අනුකූලව නව ටැංකි ඉදිකරන බවද ජනාධිපති මාධ්‍ය අංශය සඳහන් කළේය. ආරක්ෂාව, විශ්වසනීයත්වය සහ මෙහෙයුම් කාර්යක්ෂමතාව සම්බන්ධයෙන් විශේෂ අවධානයක් යොමු කරමින් මෙම ඉදිකිරීම් සිදුකෙරෙනු ඇත.
නව ගබඩා පහසුකම් මඟින් ශ්‍රී ලංකාවේ ඉන්ධන සංචිත තවදුරටත් ශක්තිමත් කිරීමටත්, ස්ථාවර පෙට්‍රෝලියම් සැපයුමක් පවත්වාගෙන යාමේ රටේ හැකියාව වැඩිදියුණු කිරීමටත් හැකි වනු ඇතැයි ජනාධිපති මාධ්‍ය අංශය වැඩිදුරටත් සඳහන් කළේය.
