යාපනය, මාදගල් කුසුමන්තුරෙයි මුහුදු තීරයේ සිදු කළ මෙහෙයුමකදී අයිස් සහ හෙරොයින් කිලෝග්රෑම් 81කට ආසන්න ප්රමාණයක් අත්අඩංගුවට ගැනීමට ශ්රී ලංකා නාවික හමුදාව සමත්ව තිබේ.
සැප්තැම්බර් 27 වැනිදා සිදු කළ මෙම මෙහෙයුමේදී රුපියල් බිලියන 1.5කට වැඩි ඇස්තමේන්තුගත වීදි වටිනාකමකින් යුත් මත්ද්රව්ය තොගය සමඟ සැකකරුවෙකු අත්අඩංගුවට ගෙන ඇති අතර, මත්ද්රව්ය ප්රවාහනය සඳහා යොදාගත් බවට සැක කෙරෙන ඩිංගි යාත්රාවක්ද නාවික හමුදා භාරයට ගෙන තිබේ.
නාවික හමුදාව සඳහන් කළේ අත්අඩංගුවට ගත් මත්ද්රව්ය අතර අයිස් හෙවත් මෙතම්ෆෙටමින් කිලෝග්රෑම් 45.5ක් පමණ සහ හෙරොයින් කිලෝග්රෑම් 35.7ක් පමණ තිබූ බවයි.
අත්අඩංගුවට ගත් මත්ද්රව්ය, සැකකරු සහ ඩිංගි යාත්රාව වැඩිදුර නීතිමය කටයුතු සඳහා යාපනය පොලිස් මත්ද්රව්ය නාශක කාර්යාංශය වෙත භාරදී තිබේ.
උතුරු නාවික විධානය වෙත ලැබුණු තොරතුරකට අනුව, ශ්රී ලංකා නාවික නෞකා අග්බෝ නෞකා කඳවුරේ සහ විධාන නාවික යාත්රා ඒකකවල නිලධාරීන් විසින් මෙම මෙහෙයුම සිදු කර ඇත.
උතුරු මුහුදු තීරයෙන් නාවික හමුදාව විසින් අත්අඩංගුවට ගත් විශාලතම අයිස් සහ හෙරොයින් මත්ද්රව්ය තොගය මෙය බව ආරක්ෂක නියෝජ්ය අමාත්ය අරුණ ජයසේකර මහතා පැවසීය.
එමෙන්ම මෙම මත්ද්රව්ය තොගය අතර කිලෝග්රෑම් පහ බැගින් වූ අයිස් පැකට් තිබී හමුවීම විශේෂත්වයක් බවත්, එවැනි පැකට් හමුවූ පළමු අවස්ථාව මෙය බවත් නියෝජ්ය අමාත්යවරයා සඳහන් කළේය.
2026 වසරේ මේ දක්වා නාවික හමුදාව විසින් අත්අඩංගුවට ගෙන ඇති මත්ද්රව්යවල ඇස්තමේන්තුගත වීදි වටිනාකම රුපියල් බිලියන 56 ඉක්මවන බවද අරුණ ජයසේකර මහතා පැවසීය. 2025 වසරේදී නාවික හමුදාව විසින් අත්අඩංගුවට ගත් මත්ද්රව්යවල වටිනාකම රුපියල් බිලියන 75කට වැඩි බවද ඔහු සඳහන් කළේය.
මුහුදු මාර්ග ඔස්සේ සිදුවන මත්ද්රව්ය ජාවාරම් මැඩලීම සඳහා මෙහෙයුම් අඛණ්ඩව සිදු කරන බව නාවික හමුදාපති වයිස් අද්මිරාල් ඩේමියන් ප්රනාන්දු මහතා පැවසීය.
දේශීය හා විදේශීය බුද්ධි අංශ, පොලිසිය, පොලිස් මත්ද්රව්ය නාශක කාර්යාංශය සහ අනෙකුත් ආයතන සමඟ එක්ව මෙම මෙහෙයුම් තවදුරටත් ක්රියාත්මක කරන බවද නාවික හමුදාපතිවරයා සඳහන් කළේය.
මත්ද්රව්ය ජාවාරම් සම්බන්ධ තොරතුරු 1818 හෝ 1997 යන දුරකථන අංක වෙත ලබාදෙන ලෙස මහජනතාවගෙන් ඉල්ලීමක් කර තිබේ.
