රත්නපුර මහා සමන් දේවාලයේ පෙරහැර සහ මහනුවර ඇසළ පෙරහැර එකම දිනක පැවැත්වීම හේතුවෙන් පෙරහර දෙකටම අලි ඇතුන් සහභාගි කරවා ගැනීම ගැටලුවක් වී ඇති බව ශ්‍රී දළදා මාලිගාවේ දියවඩන නිලමේ ප්‍රදීප් නිලංග දෑල මහතා පවසයි.
මෙවර මහනුවර ඇසළ පෙරහැර සඳහා අවම වශයෙන් අලි ඇතුන් 60කට පමණ සහභාගි විය හැකි බව ඔහු පැවසීය. මීට පෙර පැවති මහනුවර ඇසළ පෙරහැර වාරවලදී අලි ඇතුන් 75 දෙනෙකු සහභාගී වූ බවද ඔහු පැවසීය.
“රටේ හීලෑ අලි ඇතුන් 96 දෙනකු සිටින නමුත් ඔවුන්ගේ ශාරීරික සෞඛ්‍ය තත්ත්වය සහ අනෙකුත් ගැටලු හේතුවෙන් මෙවර පෙරහැර සඳහා රැගෙන යා හැක්කේ අලි ඇතුන් 80 ක් පමණි. රත්නපුර මහා සමන් දේවාලයේ පෙරහැර සඳහා අවම වශයෙන් අලි ඇතුන් 20 ක් එවීමට නියමිතය. ඉතිරි අලි ඇතුන් මහනුවර ඇසළ පෙරහැරට යොදවන බවද දියවඩන නිලමේවරයා පැවසීය.
2000 වසරේදී හීලෑ කළ අලි ඇතුන් 225ක් මෙරට සිටි නමුත් මේ වන විට එම අලි සංඛ්‍යාව 96 දක්වා අඩු වී ඇතැයි ඔහු පැවසීය.
