කාර්ය මණ්ඩල සාමාජිකයින් 24 දෙනෙකු රැගත් පැනමා ධජය සහිත භාණ්ඩ ප්රවාහන නෞකාවක් බෙංගාල බොක්කේ ගිලී යාමත් සමඟ අතුරුදන්ව සිටින පිරිස සොයා ඉන්දීය බලධාරීන් සෝදිසි සහ මුදාගැනීමේ මෙහෙයුමක් ආරම්භ කර තිබේ.
MV Ocean Winner නෞකාව ඉන්දියාවේ ඔඩිෂා ප්රාන්තයේ පරාදීප් වෙරළේ සිට නාවික සැතපුම් 240ක් පමණ දුරින් සෙනසුරාදා ගිලී ගොස් ඇති අතර, එම අවස්ථාවේදී නෞකාව සමඟ පැවති සන්නිවේදන සබඳතාද බිඳවැටී ඇත.
ජීවිතාරක්ෂක යාත්රා දෙකක සිටි කාර්ය මණ්ඩල සාමාජිකයින් දෙදෙනෙකු මේ වනවිට මුදාගෙන ඇති අතර, තවත් 22 දෙනෙකු සොයා මෙහෙයුම් අඛණ්ඩව ක්රියාත්මක වේ.
නෞකාවේ සිටි පිරිස අතර චීන ජාතිකයින් 20 දෙනෙකු, මියන්මාර ජාතිකයින් තිදෙනෙකු සහ බංග්ලාදේශ ජාතිකයෙකු සිටි බව සඳහන් වේ.
ඉන්දීය වෙරළාරක්ෂක බලකාය සහ ඉන්දීය නාවික හමුදාව සෝදිසි මෙහෙයුම සඳහා නෞකා යොදවා ඇති අතර, අවට මුහුදේ ගමන් කරන අනෙකුත් නෞකා වෙතද අතුරුදන් වූ පිරිස සොයා සහාය වන ලෙස දැනුම් දී තිබේ.
MV Ocean Winner නෞකාව අගෝස්තු 20 වැනිදා පරාදීප් වරායෙන් සිංගප්පූරුව බලා පිටත්ව ගොස් ඇති අතර, එය යකඩ ඛනිජ රැගෙන යමින් සිටියදී මෙම අනතුර සිදුව තිබේ.
නෞකාව ගිලී යාමට හේතුව මෙතෙක් අනාවරණය වී නොමැත.
