ශ්‍රී ලංකා ට්‍රාන්ස්පේරන්සි ඉන්ටර්නැෂනල් ආයතනය (Transparency International Sri Lanka) විසින් ගොනු කරන ලද මෝසමක් සලකා බැලීමෙන් අනතුරුව, අගවිනිසුරු ප්‍රීති පද්මන් සූරසේන මහතාගේ සභාපතිත්වයෙන් යුත් ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල මෙම නියෝගය නිකුත් කර තිබේ.
අදාළ වගඋත්තරකරුවන් සිව්දෙනා අතර හිටපු සෞඛ්‍ය අමාත්‍යාංශ ලේකම් ජනක චන්ද්‍රගුප්ත මහතා ද සිටියි.
ශ්‍රේෂ්ඨාධිකරණය මීට පෙර ලබාදුන් තීන්දුවකට අනුව වන්දි ගෙවීමට අපොහොසත් වීම හේතුවෙන් වගඋත්තරකරුවන් අධිකරණයට අපහාස කර ඇති බවට එම මෝසම මඟින් චෝදනා කර තිබිණි.
පසුගිය රජය සමයේ ප්‍රමිතියෙන් තොර ඖෂධ ආනයනය කිරීමෙන් මූලික අයිතිවාසිකම් උල්ලංඝනය වී ඇති බවට ශ්‍රේෂ්ඨාධිකරණය 2026 මාර්තු මාසයේදී තීන්දු කළේය.
ඒ අනුව, හිටපු අමාත්‍ය කෙහෙළිය රඹුක්වැල්ල මහතා ඇතුළු වගඋත්තරකරුවන් පස්දෙනෙකුට එම මූලික අයිතිවාසිකම් උල්ලංඝනය කිරීම සම්බන්ධයෙන් වන්දි ගෙවන ලෙස අධිකරණය නියෝග කර තිබිණි.
එහිදී රඹුක්වැල්ල මහතාට රුපියල් මිලියන 75ක වන්දි මුදලක් ගෙවීමට නියම කර තිබූ අතර, නවතම නඩු විභාගයේදී ඔහු වෙනුවෙන් පෙනී සිටි නීතිඥවරයා අධිකරණයට දැනුම් දී ඇත්තේ එම මුදලින් මේ වන විට ගෙවා ඇත්තේ රුපියල් මිලියන 20ක් පමණක් බවයි.
ශ්‍රේෂ්ඨාධිකරණය නියම කළ පරිදි වන්දි මුදල් සම්පූර්ණයෙන් ගෙවීමට වගඋත්තරකරුවන් අපොහොසත් වීම හේතුවෙන් මෙම නව නියෝග නිකුත් කර තිබේ.
