වයස අවුරුදු 16ට අඩු ළමුන් සමාජ මාධ්ය භාවිත කිරීම තහනම් කිරීම සඳහා වන නීති කඩිනමින් සම්මත කරන ලෙස පාර්ලිමේන්තු මන්ත්රී ෆයිසර් මුස්තාපා මහතා ඉල්ලා සිටියේය.
පාර්ලිමේන්තුවේදී කල් තැබීමේ යෝජනාවක් යටතේ අදහස් දක්වමින් ඔහු සඳහන් කළේ, ළමුන්ගේ මානසික සෞඛ්යය, ආරක්ෂාව සහ අධ්යාපනයට සමාජ මාධ්ය හරහා එල්ල වන බරපතළ අවදානම් හේතුවෙන් මෙම පියවර තවදුරටත් ප්රමාද නොකළ යුතු බවයි.
අවම වයස් සීමාවක් හඳුන්වාදීම සම්බන්ධ පෞද්ගලික මන්ත්රී පනත් කෙටුම්පතක් තමන් විසින් දැනටමත් ඉදිරිපත් කර ඇති බවත්, අධිකරණ අමාත්යවරයා සමඟ සාකච්ඡා කිරීමෙන් අනතුරුව එය මේ වනවිට නීති කෙටුම්පත් කිරීමේ අදියරේ පවතින බවත් මුස්තාපා මහතා පැවසීය.
මෙය තාක්ෂණයට එරෙහි පියවරක් නොවන බව අවධාරණය කළ ඔහු, අන්තර්ජාලය හරහා ළමුන්ට සිදුවිය හැකි හානිවලින් ඔවුන් ආරක්ෂා කිරීම සඳහා මෙය අවශ්ය ආරක්ෂණ ක්රියාමාර්ගයක් බව සඳහන් කළේය.
ජාත්යන්තර උදාහරණ පෙන්වා දෙමින් ඔහු එක්සත් රාජධානියේ Children’s Well-being and Schools Bill සහ Online Safety Act මෙන්ම ඔස්ට්රේලියාවේ Social Media Minimum Age Act සම්බන්ධයෙන්ද පාර්ලිමේන්තුවේ අවධානය යොමු කළේය.
ශ්රී ලංකාවේ යෝජිත නීතිය යටතේ Instagram, TikTok, YouTube, Snapchat, Facebook සහ Twitter වැනි සමාජ මාධ්ය වේදිකාවලට ළමුන්ගේ ප්රවේශය සීමා කිරීමට යෝජනා කර ඇති අතර, WhatsApp වැනි සන්නිවේදන සේවා ඊට ඇතුළත් නොවන බවද ඔහු පැවසීය.
මෙම නීතියේ අවශ්යතාව අවධාරණය කරමින් මුස්තාපා මහතා ශ්රී ලංකාවේ සයිබර් ආරක්ෂාව සම්බන්ධ දත්ත කිහිපයක්ද ඉදිරිපත් කළේය.
ශ්රී ලංකාව සයිබර් අවකාශ තර්ජන සම්බන්ධයෙන් ලෝකයේ 20 වැනි ස්ථානයේ පසුවන බවත්, එක් වසරක් තුළ තර්ජන මිලියන 9.1ක් හඳුනාගෙන ඇති බවත් ඔහු සඳහන් කළේය.
ඔහු පැවසූ පරිදි, ශ්රී ලංකාවේ තරුණයන්ගෙන් සියයට 52.8ක් අන්තර්ජාලය භාවිත කරන අතර, ඔවුන් පළමුවරට අන්තර්ජාලයට පිවිසෙන සාමාන්ය වයස අවුරුදු 13කි.
දරුවන්ගෙන් සියයට 46.3ක් අන්තර්ජාලය හරහා නාඳුනන පුද්ගලයන් සමඟ සන්නිවේදනය කර ඇති බවත්, ඉන් සියයට 27.9ක් පසුව එම පුද්ගලයන් සමඟ සැබෑ ජීවිතයේදී හමුවී ඇති බවත් ඔහු පැවසීය.
එමෙන්ම අන්තර්ජාලය භාවිත කරන තරුණයන්ගෙන් සියයට 28ක් අන්තර්ජාලය හරහා ප්රචණ්ඩත්වයට මුහුණ දී ඇති අතර, සියයට 27ක් සයිබර් හිරිහැර කිරීම් සහ කප්පම් ඉල්ලීම්වලට මුහුණ දී ඇති බවද ඔහු සඳහන් කළේය.
සෑම දරුවන් පස් දෙනෙකුගෙන් එක් අයෙකුම තමන්ගේ අසභ්ය ඡායාරූප අන්තර්ජාලය හරහා හුවමාරු කර ඇති බව වාර්තා කර ඇති අතර, අන්තර්ජාලය ආශ්රිත හිංසනයට ලක්වන දරුවන්ගෙන් සියයට 92ක් එම සිදුවීම් කිසිවිටෙකත් වාර්තා නොකරන බවද මුස්තාපා මහතා පැවසීය.
ළමා ලිංගික අපයෝජන ද්රව්ය අන්තර්ජාලයේ පවතින අනුපාතය සෑම 1,000කට 27.8ක් ලෙසද ඔහු සඳහන් කළේය.
සීමා රහිත අන්තර්ජාල ප්රවේශය හේතුවෙන් ලිංගික අපයෝජන, මත්ද්රව්ය ලබාගැනීම සඳහා පෙළඹවීම්, අන්තර්ජාලය හරහා හඳුනාගත් නාඳුනන පුද්ගලයන්ගෙන් සිදුවන දූෂණ සහ අන්තර්ජාලයට ඇබ්බැහි වීම සම්බන්ධ තරුණ සියදිවි නසාගැනීම් වැනි බරපතළ සිදුවීම් ඇති වී ඇති බවටද ඔහු අනතුරු ඇඟවීය.
දරුවන්ගේ ජංගම දුරකථන භාවිත පුරුදු පාලනය කිරීමට නොහැකිව දෙමාපියන් දැඩි අසීරුතාවකට පත්ව සිටින බව පැවසූ ඔහු, නීතිමය තහනමක් ඔවුන්ට බාහිර සීමාවක් ලෙස උපකාරී වනු ඇති බවද සඳහන් කළේය.
“අද දරුවාගේ හොඳම මිතුරා බවට පත්ව ඇත්තේ දුරකථනයයි” යනුවෙන් සඳහන් කළ මුස්තාපා මහතා, ළමා විය ක්රමයෙන් අහිමි වෙමින් පවතින බවට කනගාටුව පළ කළේය.
මේ හේතුවෙන් හුදෙකලා වීම, සමාජ සම්බන්ධතා පිරිහීම සහ මානසික සෞඛ්ය අර්බුද ඇතිවිය හැකි බවට මනෝවිද්යාඥයන් අනතුරු අඟවා ඇති බවද ඔහු පැවසීය.
අවසානයේදී වයස් තහවුරු කිරීමේ ක්රමවේදයක් කඩිනමින් ස්ථාපිත කරමින්, සමාජ මාධ්ය වේදිකා වගකීමට බැඳ තැබීම සඳහා පාර්ලිමේන්තුව එක්ව කඩිනමින් ක්රියා කළ යුතු බව මුස්තාපා මහතා ඉල්ලා සිටියේය.
“මෙම පනත් කෙටුම්පත සම්මත කිරීම ප්රමාද වන සෑම දිනකම දරුවෙකු අපයෝජනයට ලක් වෙනවා. දරුවෙකුගේ ඡායාරූපයක් සමාජ මාධ්යවල පළ වෙනවා. දරුවෙකු විවිධ ආකාරයේ ලිංගික හිරිහැරවලට ලක් වෙනවා” යනුවෙන් ඔහු අනතුරු ඇඟවූ අතර, ශ්රී ලංකාවේ දරුවන් ආරක්ෂා කිරීම සඳහා වහාම නීතිමය ක්රියාමාර්ග ගත යුතු බව අවධාරණය කළේය.
