Godzilla vs. Kong චිත්රපට මාලාවේ ජියා (Jia) චරිතය නිරූපණය කිරීමෙන් ප්රසිද්ධියට පත් බිහිරි නිළි කේලී හොට්ල් (Kaylee Hottle), ඇමෙරිකාවේ මැරීලන්ඩ් ප්රාන්තයේ සිදු වූ රිය අනතුරකින් මියගොස් තිබේ. ඇය මියයන විට වයස අවුරුදු 18කි.
හොට්ල් 2021 වසරේ තිරගත වූ දැවැන්ත සාර්ථකත්වයක් ලැබූ Godzilla vs. Kong චිත්රපටයේ තරුණ අනාථ දැරියක වන ජියාගේ චරිතය රඟපෑ අතර, 2024 වසරේ නිකුත් වූ එහි අනුප්රාප්තික චිත්රපටය වන Godzilla x Kong: The New Empire හිද එම චරිතය නැවත නිරූපණය කළාය.
ඇගේ පියා වන ජොෂුවා හොට්ල් (Joshua Hottle) ෆේස්බුක් හරහා ඇමෙරිකානු සංඥා භාෂාව (American Sign Language) භාවිතයෙන් නිකුත් කළ වීඩියෝ ප්රකාශයක් මගින් ඇගේ මරණය තහවුරු කළේය.
ෆ්රෙඩ්රික් ප්රාන්ත ෂෙරිෆ් කාර්යාලය (Frederick County Sheriff’s Office) සඳහන් කළේ, මෙම අනතුර අඟහරුවාදා අලුයම 2.50ට පමණ මැරීලන්ඩ් ප්රාන්තයේ ඉජම්ස්විල් (Ijamsville) ප්රදේශයේදී සිදුව ඇති බවයි.
පොලිසිය පැවසුවේ, මෙම අනතුරට සම්බන්ධ වී ඇත්තේ එක් වාහනයක් පමණක් බවත්, අධික වේගය අනතුරට බලපෑ ප්රධාන සාධකයක් විය හැකි බවට විශ්වාස කරන බවත්ය.
අනතුරට සම්බන්ධ වාහනය පැදවූ 19 හැවිරිදි රියදුරෙකු ජීවිතයට තර්ජනයක් නොවන තුවාල සහිතව රෝහල්ගත කර ඇති අතර, තවත් මගියෙකු අනතුර සිදුවූ ස්ථානයේදී වෛද්ය ප්රතිකාර ලබා ගැනීම ප්රතික්ෂේප කර ඇත.
හොට්ල් අධ්යාපනය ලැබූ ටෙක්සාස් බිහිරි පාසල (Texas School for the Deaf) ඇගේ මරණය පිළිබඳව “ගැඹුරු කනගාටුවෙන්” නිවේදනය කළ අතර, පවුලේ පෞද්ගලිකත්වයට ගරු කරන ලෙසත්, අනතුර සම්බන්ධයෙන් අනුමාන සහ ප්රචාරවලින් වැළකී සිටින ලෙසත් ජනතාවගෙන් ඉල්ලා සිටියේය.
Godzilla x Kong චිත්රපට නිෂ්පාදනය කළ වෝනර් බ්රදර්ස් (Warner Bros.) ආයතනයද X සමාජ මාධ්යයේ සටහනක් නිකුත් කරමින් තරුණ නිළියට ගෞරව දැක්වීය. එම චිත්රපටවලදී ඇය රෙබෙකා හෝල් (Rebecca Hall), ඩෑන් ස්ටීවන්ස් (Dan Stevens) සහ බ්රයන් ටයිරි හෙන්රි (Brian Tyree Henry) වැනි නළු නිළියන් සමඟ රංගනයෙන් එක්වූවාය.
ජියාගේ චරිතය හරහා බිහිරි ප්රජාවට හොලිවුඩ් ප්රධාන ධාරාවේ වැඩි නියෝජනයක් ලබාදීමට දායක වූ නිළියක් ලෙස කේලී හොට්ල් පුළුල් පිළිගැනීමක් ලබා සිටියාය.
