අවශ්‍ය ආනයනකරුගේ සහ ලේබල් තොරතුරු නොමැතිව ආනයනික භාණ්ඩ අලෙවිය සඳහා ප්‍රදර්ශනය කළ කොළඹ ව්‍යාපාරික ස්ථාන තුනකට රු. 300,000ක දඩ මුදලක් නියම කර තිබේ.
පාරිභෝගික කටයුතු පිළිබඳ අධිකාරිය (CAA) පැවසුවේ අතිවිශේෂ ගැසට් පත්‍රයේ අංක 2286/26 යටතේ ප්‍රකාශයට පත් කර ඇති අංක 85 දරන නියෝගය උල්ලංඝනය කිරීම සම්බන්ධයෙන් එම ව්‍යාපාරික ස්ථානවලට එරෙහිව නීතිමය පියවර ගත් බවයි.
කොළඹ ප්‍රධාන මහේස්ත්‍රාත් අධිකරණය විසින් එක් එක් ව්‍යාපාරික ස්ථානයට රු. 100,000 බැගින් දඩ නියම කර තිබේ.
කොල්ලුපිටිය 16 වැනි පටුමගේ පිහිටි Wuhan Chinese Restaurant ආනයනික ආහාර නිෂ්පාදන අවශ්‍ය තොරතුරු නොමැතිව අලෙවිය සඳහා ප්‍රදර්ශනය කිරීම සම්බන්ධයෙන් වරදකරු කර දඩ නියම කර ඇත.
පිටකොටුව සී ස්ට්‍රීට්හි පිහිටි Diligenics Lanka Holding (Pvt) Ltd සම්බන්ධයෙන් නීතිමය පියවර ගෙන ඇත්තේ මදුරු විකර්ෂක ආලේපන නිෂ්පාදන නීතියෙන් නියම කර ඇති ලේබල් තොරතුරු නොමැතිව අලෙවි කිරීම සම්බන්ධයෙනි.
වැල්ලවත්ත ඩබ්ලිව්.ඒ. සිල්වා මාවතේ පිහිටි Quebec Gateway (Pvt) Ltd ආනයනකරු පිළිබඳ අවශ්‍ය තොරතුරු නොමැතිව පාවහන් අලෙවිය සඳහා ප්‍රදර්ශනය කිරීම සම්බන්ධයෙන් දඩ නියම කර තිබේ.
ආනයනික ආහාර, ශරීර සත්කාර නිෂ්පාදන සහ පාවහන් ඇතුළු භාණ්ඩ මිලදී ගැනීමේදී ලේබල පරීක්ෂා කරන ලෙස පාරිභෝගික කටයුතු පිළිබඳ අධිකාරිය පාරිභෝගිකයන්ගෙන් ඉල්ලා සිටී.
භාණ්ඩයේ දේශීය ආනයනකරු, මිල සහ අදාළ අනෙකුත් නිෂ්පාදන තොරතුරු නිසි පරිදි සඳහන් කර තිබේද යන්න පරීක්ෂා කරන ලෙසද අධිකාරිය දැනුම් දෙයි.
අවශ්‍ය තොරතුරු නොමැතිව ආනයනික භාණ්ඩ අලෙවි කිරීම සම්බන්ධ පැමිණිලි කාර්යාල වේලාවන් තුළ 1977 පාරිභෝගික පැමිණිලි දුරකථන අංකය ඔස්සේ ඉදිරිපත් කළ හැකි බවද පාරිභෝගික කටයුතු පිළිබඳ අධිකාරිය වැඩිදුරටත් සඳහන් කරයි.
