දින පහක් පුරා පැවැත්වෙන මෙම වැඩසටහන, ගුවර්න්සි පාර්ලිමේන්තුව වන States of Deliberation හි සහාය ඇතිව පොදුරාජ්‍ය මණ්ඩලීය පාර්ලිමේන්තු ඇකඩමිය විසින් සංවිධානය කරනු ලබයි. ඊට පොදුරාජ්‍ය මණ්ඩලීය රටවල් රැසකින් පාර්ලිමේන්තු මන්ත්‍රීවරුන් 30 දෙනකු පමණ සහභාගී වෙති.
ශ්‍රී ලංකාව නියෝජනය කරමින් නියෝජ්‍ය අමාත්‍ය කෞශල්‍යා ආරියරත්න මහත්මිය සහ ගම්පහ දිස්ත්‍රික් සමගි ජන බලවේගයේ පාර්ලිමේන්තු මන්ත්‍රී කාවින්ද ජයවර්ධන මහතා මෙම වැඩසටහනට එක්ව සිටිති.
කෙන්යාව, නැමීබියාව, මෝල්ටාව, පාකිස්තානය, ශාන්ත ලුසියා, කැනඩාව, ඕස්ට්‍රේලියාව සහ ගුවර්න්සි යන රටවල් හා ප්‍රදේශ නියෝජනය කරන පාර්ලිමේන්තු මන්ත්‍රීවරුද ඊට සහභාගී වෙති.
පාර්ලිමේන්තු කටයුතු පිළිබඳ පරීක්ෂාව, කාරක සභා කටයුතු, සන්නිවේදනය සහ 21 වැනි සියවසේ පාර්ලිමේන්තු මන්ත්‍රීවරුන්ගේ වෙනස් වෙමින් පවතින භූමිකාව ඇතුළු ක්ෂේත්‍ර ඔස්සේ පාර්ලිමේන්තු ක්‍රියාකාරීත්වය ශක්තිමත් කිරීම මෙම වැඩසටහනේ ප්‍රධාන අරමුණයි.
වැඩසටහනේ කොටසක් ලෙස සහභාගී වූ මන්ත්‍රීවරු, ගුවර්න්සි පාර්ලිමේන්තුවේ පුරප්පාඩු වන ආසන පිරවීමේ ක්‍රියාපටිපාටිය සම්බන්ධයෙන් වන 2025 ප්‍රතිසංස්කරණ (ගුවර්න්සි) (සංශෝධන) නීතිය පිළිබඳ අනුකරණ පාර්ලිමේන්තු විවාදයකටද එක්වූහ.
මීට අමතරව, උපදේශකත්ව සැසි, අනුකරණ කාරක සභා ක්‍රියාකාරකම් සහ ගුවර්න්සි පාර්ලිමේන්තු ආයතන සමඟ අත්දැකීම් හුවමාරු කරගැනීමේ අවස්ථාද වැඩසටහනට ඇතුළත් වේ.
පාර්ලිමේන්තු මන්ත්‍රීවරුන්ගේ කුසලතා වර්ධනය කිරීම, අත්දැකීම් හුවමාරුව ප්‍රවර්ධනය කිරීම සහ පොදුරාජ්‍ය මණ්ඩලීය රටවල පාර්ලිමේන්තු මන්ත්‍රීවරුන් අතර සහයෝගීතාව ශක්තිමත් කිරීම මෙම වැඩසටහනේ අරමුණයි.
