පිරිමි සහ කාන්තා ක්‍රිකට් තරගවල ප්‍රතිඵල එකතු කර සමස්ත ජයග්‍රාහකයා තීරණය කරන නව ක්‍රිකට් තරග රටාවක් වන ‘ටෙස්ට් ටුවෙන්ටි’ (Test Twenty) තරගාවලියේ පළමු අදියර නොවැම්බර් 14 සිට 29 දක්වා කොළඹ සිංහලීස් ක්‍රීඩා සමාජ (SSC) ක්‍රීඩාංගණයේදී පැවැත්වීමට නියමිතය.
සංවිධායකයන් මෙම නව තරග රටාව ක්‍රිකට් ක්‍රීඩාවේ සිව්වැනි ආකෘතිය ලෙස හඳුන්වා දී තිබේ. එහිදී රතු පන්දුව සහ සුදු පන්දුව භාවිත කරන ක්‍රිකට් ක්‍රීඩාව එක් දිනකදී පන්දුවාර 80ක තරගයක් ලෙස ඒකාබද්ධ කෙරේ.
ඔක්තෝබර් 16 වැනිදා නිකුත් කළ නිවේදනයකට අනුව, වයස අවුරුදු 13ත් 21ත් අතර ලොව පුරා තරුණ ක්‍රිකට් ක්‍රීඩක ක්‍රීඩිකාවන් 160 දෙනෙකු මෙම තරගාවලියට එක්වීමට නියමිතය. ඔවුන් මහාද්වීප හතරක් නියෝජනය කරන කණ්ඩායම් හතරකට බෙදා තරග වදිනු ඇත.
එක් කණ්ඩායමකට ක්‍රීඩක ක්‍රීඩිකාවන් 40 දෙනෙකු ඇතුළත් වන අතර, ඊට ක්‍රීඩිකාවන් 20 දෙනෙකු සහ ක්‍රීඩකයන් 20 දෙනෙකු බැගින් ඇතුළත් වේ. කාන්තා සහ පිරිමි කණ්ඩායම් වෙන වෙනම ක්‍රීඩා කළද, ඔවුන් ලබාගන්නා ලකුණු එකතු කර සමස්ත කණ්ඩායමේ ලකුණු සංඛ්‍යාව තීරණය කෙරේ.
මෙම නව තරග රටාව යටතේ සෑම තරගයකදීම පන්දුවාර 80ක් ක්‍රීඩා කෙරේ. පළමු පන්දුවාර 40 දිවා කාලයේදී රතු පන්දුවෙන් සහ සාම්ප්‍රදායික සුදු ඇඳුමින් සැරසී ක්‍රීඩා කරනු ඇත.
ඉතිරි පන්දුවාර 40 විදුලි ආලෝකය යටතේ වර්ණ ඇඳුමින් සැරසී සුදු පන්දුවෙන් ක්‍රීඩා කෙරේ.
තරගයේ කොටස් දෙකේදීම කාන්තා සහ පිරිමි කණ්ඩායම් ලබාගන්නා ලකුණු එකතු කර ජයග්‍රාහකයා තීරණය කෙරේ. ඒ අනුව, කාන්තා සහ පිරිමි කණ්ඩායම් දෙකම ලබාගන්නා ලකුණු අවසන් ප්‍රතිඵලයට සමානව දායක වේ.
කාසියේ වාසිය මඟින් පළමුව පන්දුවට පහර දෙන කණ්ඩායම මෙන්ම පළමුව පැවැත්වෙන්නේ කාන්තා තරගයද පිරිමි තරගයද යන්න තීරණය කෙරේ.
සංවිධායකයන් පවසන්නේ පසුගිය දින 300 තුළ මහාද්වීප පහක තරුණ ක්‍රිකට් ක්‍රීඩක ක්‍රීඩිකාවන් දහස් ගණනක් තේරීම් පරීක්ෂණවලට සහභාගි වී ඇති බවයි. අවසන් ක්‍රීඩක ක්‍රීඩිකාවන් 160 දෙනාගේ නම් මේ මාසයේ අගභාගයේදී පැවැත්වෙන තේරීම් කෙටුම්පත් ක්‍රියාවලියක් (Draft) මඟින් ප්‍රකාශයට පත් කිරීමට නියමිතය.
මෙම තරගාවලියේ උපදේශක මණ්ඩලයට ජාත්‍යන්තර ක්‍රිකට් ක්‍රීඩාවේ හිටපු තරු වන ඒ.බී. ඩි විලියර්ස්, මැතිව් හේඩන් සහ ශ්‍රීමත් ක්ලයිව් ලොයිඩ් ඇතුළත් වෙති. ඉන්දීය පිතිකරු විරාත් කෝලිට පුහුණුව ලබාදුන් රාජ්කුමාර් ශර්මා ගෝලීය තේරීම් කමිටුවේ සභාපතිත්වය දරයි.
ටෙස්ට් ටුවෙන්ටි නිර්මාතෘ ගෞරව් බහිර්වානි පැවසුවේ, ශ්‍රී ලංකාවේ පාසල් ක්‍රිකට් ක්‍රීඩාවට ඇති ශක්තිමත් පදනම සහ ක්‍රීඩාව කෙරෙහි පවතින උනන්දුව හේතුවෙන් පළමු තරගාවලිය පැවැත්වීම සඳහා ශ්‍රී ලංකාව තෝරාගත් බවයි.
“අපි මේ සඳහා සුදුසුම නිවහන සොයාගත්තා. ශ්‍රී ලංකාවේ පාසල් ක්‍රිකට් තරගයක් නැරඹීමට ක්‍රීඩාංගණයක් පිරී යනවා. මේ දූපතේ ජනතාව තරුණ ක්‍රිකට් ක්‍රීඩකයන්ට දක්වන ආදරය තරම් ආදරයක් ලෝකයේ කිසිදු රටක නැහැ,” යැයි ඔහු පැවසීය.
මෙම වැඩපිළිවෙළට සහාය දැක්වීම සම්බන්ධයෙන් ශ්‍රී ලංකා ක්‍රිකට් ආයතනයට සහ සිංහලීස් ක්‍රීඩා සමාජයේ පරිපාලනයටද බහිර්වානි මහතා සිය ස්තුතිය පළ කළේය.
තරගාවලිය නොවැම්බර් 14 වැනිදා සමාරම්භක උත්සවයකින් ආරම්භ වන අතර, අවසන් තරගය නොවැම්බර් 29 වැනිදා පැවැත්වීමට නියමිතය. නොවැම්බර් 30 වැනිදා අමතර දිනයක් ලෙස වෙන් කර ඇත.
සියලුම තරග සෝනි ස්පෝර්ට්ස් නෙට්වර්ක් (Sony Sports Network) ඔස්සේ සජීවීව විකාශය කරන බව සංවිධායකයෝ පවසති. ජාත්‍යන්තර රූපවාහිනී විකාශන සහ මාර්ගගත ප්‍රවාහන විකාශන කටයුතු සඳහාද සැලසුම් කර තිබේ.
ටෙස්ට් ටුවෙන්ටි තරග රටාව ගෞරව් බහිර්වානි විසින් නිර්මාණය කර ඇති අතර, එහි හිමිකාරීත්වය Parity Sports India Private Limited සමාගම සතුය.
