ශ්රී ලංකාව 2026 හෙන්ලි විදේශ ගමන් බලපත්ර දර්ශකයේ (Henley Passport Index) ගෝලීය ශ්රේණිගත කිරීම් අනුව 94 වැනි ස්ථානයට පැමිණ ඇති අතර, එය 2014 වසරෙන් පසු රට වාර්තා කළ ඉහළම ස්ථානය ලෙස සැලකේ.
නවතම දර්ශකයට අනුව ශ්රී ලංකා විදේශ ගමන් බලපත්රය ලොව 94 වැනි ස්ථානයේ ශ්රේණිගත කර ඇති අතර, රටවල් සහ ගමනාන්ත 39කට වීසා රහිතව හෝ පැමිණීමේදී වීසා (Visa-on-Arrival) ලබාගෙන ඇතුළු වීමේ පහසුකම එහි හිමිකරුවන්ට හිමි වේ. මෙම ශ්රේණිගත කිරීමේදී ශ්රී ලංකාව ලිබියාව සමඟ එකම ස්ථානයේ පසුවෙයි.
2026 වසරේ මෙම ශ්රේණිගත කිරීම, 2025 වසරේ හිමි වූ 97 වැනි ස්ථානයට සාපේක්ෂව ස්ථාන තුනක දියුණුවක් පෙන්නුම් කරන අතර, 2014 වසරේ 88 වැනි ස්ථානයට පත්වීමෙන් පසු ශ්රී ලංකාව ලබාගත් හොඳම ප්රතිඵලය ද මෙය වේ.
2021 වසරේ 107 වැනි ස්ථානය දක්වා පහළ වැටුණු ශ්රී ලංකාව, ඉන් අනතුරුව සෑම වසරකම සිය ස්ථානය ක්රමයෙන් ඉහළ නංවාගෙන තිබේ. ඒ අනුව 2022 දී 102 වැනි ස්ථානයටත්, 2023 දී 100 වැනි ස්ථානයටත්, 2024 දී 96 වැනි ස්ථානයටත්, 2025 දී 97 වැනි ස්ථානයටත්, 2026 දී 94 වැනි ස්ථානයටත් ශ්රේණිගත වී ඇත.
හෙන්ලි විදේශ ගමන් බලපත්ර දර්ශකය ලොව ප්රමුඛතම විදේශ ගමන් බලපත්ර ශක්තිය මැනීමේ දර්ශකයක් ලෙස සැලකෙන අතර, එය ලොව විදේශ ගමන් බලපත්ර 199ක්, ඒවායේ හිමිකරුවන්ට පෙර වීසා ලබා නොගෙන ගමන් කළ හැකි ගමනාන්ත සංඛ්යාව පදනම් කරගෙන ශ්රේණිගත කරයි.
මෙම ශ්රේණිගත කිරීම් ජාත්යන්තර ගුවන් ප්රවාහන සංගමයේ (IATA) විශේෂ දත්ත මත පදනම් වන අතර, ගෝලීය සංචාරක ප්රවේශයේ සිදුවන වෙනස්කම් අනුව ඒවා නිතිපතා යාවත්කාලීන කරනු ලැබේ.
2026 Henley Passport Index : https://cdn.henleyglobal.com/storage/app/media/HPI/Henley%20Passport%20Index%202026%20July%20Global%20Ranking.pdf
