මහ වැස්සට මහනුවර ජාතික රෝහලේ බිම් මහල යටවෙයි
පසුගිය සෙනසුරාදා රාත්‍රියේ ඇදහැලුණු ධාරානිපාත වර්ෂාව හේතුවෙන් මහනුවර ජාතික රෝහලේ බාහිර රෝගී අංශයේ (OPD) බිම් මහලේ කොටසක් ජලයෙන් යටවී ඇති බව වාර්තා වේ.
සිද්ධිය සැලවීමත් සමඟ මධ්‍යම පළාත් ආණ්ඩුකාර ආචාර්ය හර්ෂ සුරංග ප්‍රනාන්දු මහතා ඊයේ (ඉරිදා) පෙරවරුවේ රෝහල වෙත ගොස් ජලයෙන් යටවූ ප්‍රදේශ නිරීක්ෂණය කරමින් පවතින තත්ත්වය සොයා බැලීය.
නිරීක්ෂණ චාරිකාව අතරතුරදී ආණ්ඩුකාරවරයා රෝහල් පාලනාධිකාරියට සහ අදාළ නිලධාරීන්ට උපදෙස් ලබා දුන්නේ, රෝහලේ දෛනික කටයුතු කඩිනමින් යථා තත්ත්වයට පත්කිරීමට අවශ්‍ය ක්ෂණික පියවර ගන්නා ලෙසයි.
හමුදාව සහ නගර සභාව එක්ව පිරිසිදු කිරීම් අරඹයි
ආණ්ඩුකාරවරයාගේ සෘජු මැදිහත්වීමෙන් අනතුරුව, ශ්‍රී ලංකා යුද හමුදාව සහ මහනුවර මහ නගර සභාව රෝහල් කාර්ය මණ්ඩලය සමඟ එක්ව ජලයෙන් යටවූ ප්‍රදේශ පිරිසිදු කිරීමේ සහ යථා තත්ත්වයට පත්කිරීමේ ඒකාබද්ධ මෙහෙයුමක් ආරම්භ කළහ.
අද (සඳුදා) දිනය වන විට රෝහලේ සාමාන්‍ය ප්‍රතිකාර සහ දෛනික සේවාවන් බාධාවකින් තොරව පවත්වාගෙන යාම තහවුරු කිරීම සඳහා අවශ්‍ය සියලු විධිවිධාන සලසන ලෙසද ආණ්ඩුකාරවරයා නිලධාරීන්ට නියෝග කළේය.
මෙම නිරීක්ෂණ අවස්ථාව සඳහා රෝහල් අධ්‍යක්ෂවරුන්, වෛද්‍ය හා සෞඛ්‍ය කාර්ය මණ්ඩලය මෙන්ම අදාළ ආයතනවල ජ්‍යෙෂ්ඨ නියෝජිතයෝ පිරිසක්ද එක්ව සිටියහ.
