හිටපු ජනාධිපති මහින්ද රාජපක්ෂ මහතා සාමාන්‍ය වෛද්‍ය පරීක්ෂාවක් සඳහා කොළඹ පෞද්ගලික රෝහලකට ඇතුළත් කර තිබේ. කෙසේ වෙතත්, ඔහු බරපතළ ලෙස රෝගාතුර වී ඇති බවට හෝ දැඩි සත්කාර ඒකකයේ (ICU) ප්‍රතිකාර ලබන බවට පළවන වාර්තා ඔහුගේ කණ්ඩායම ප්‍රතික්ෂේප කරයි.
80 හැවිරිදි හිටපු ජනාධිපතිවරයාගේ සෞඛ්‍ය තත්ත්වය ස්ථාවර බවත්, බරපතළ සෞඛ්‍ය ගැටලුවක් නොමැති බවත් රාජපක්ෂ මහතාගේ කණ්ඩායමේ ආරංචි මාර්ගයක් Newswire වෙබ් අඩවියට පවසා තිබේ.
ඔහුගේ තත්ත්වය බරපතළ බවට හෝ දැඩි සත්කාර ඒකකයේ ප්‍රතිකාර ලබන බවට පළවූ මාධ්‍ය වාර්තා ද එම ආරංචි මාර්ගය ප්‍රතික්ෂේප කර ඇත.
මේ අතර, හිටපු ජනාධිපති ආර්යා ශිරන්ති රාජපක්ෂ මහත්මිය තවදුරටත් රක්ෂිත බන්ධනාගාරගතව සිටින අතර, ඇයගේ නඩුව අද අඟහරුවාදා (13) අධිකරණයේදී කැඳවීමට නියමිතය. එහිදී ඇයගේ ඇප අයදුම්පත සලකා බැලීමට අපේක්ෂා කෙරේ.
ඔවුන්ගේ පුත්‍රයා වන පාර්ලිමේන්තු මන්ත්‍රී නාමල් රාජපක්ෂ මහතා ද මේ වන විට ක්‍රියාත්මක විමර්ශනයකට අදාළව රක්ෂිත බන්ධනාගාරගතව සිටියි.
