දරුවන් විදෙස්ගත වූ වැඩිහිටියන්ගේ ආරක්ෂාවට පොලීසියෙන් උපදෙස් මාලාවක්

මුදල්, රන් ආභරණ සහ අනෙකුත් වටිනා භාණ්ඩ කොල්ලකෑම සඳහා අපරාධකරුවන් හුදකලා නිවාස ඉලක්ක කර ගැනීමේ සිද්ධීන් කිහිපයක් මෑතකදී වාර්තා වීමත් සමඟ, තනිව ජීවත් වන වැඩිහිටියන් මංකොල්ලකෑම් සහ ඝාතන අවදානමකට මුහුණ දී සිටින බවට ශ්රී ලංකා පොලීසිය අනතුරු අඟවා තිබේ.
නොවැම්බර් 17 වැනිදා නිවේදනයක් නිකුත් කරමින් පොලීසිය සඳහන් කළේ, විශේෂයෙන්ම දරුවන් රැකියා සඳහා පිටතට යාම හෝ විදේශගත වීම හේතුවෙන් තනිව වෙසෙන වැඩිහිටියන් අපරාධ ක්රියාවන්ට ගොදුරු වීමේ වැඩි අවදානමක් පවතින බවයි.
මත්ද්රව්යවලට ඇබ්බැහි වූ පුද්ගලයින් වටිනා භාණ්ඩ සොරකම් කිරීම සඳහා මෙවැනි නිවාස ඉලක්ක කර ගැනීමට ඉඩ ඇති බවත්, මෑතකදී වාර්තා වූ සිදුවීම් කිහිපයකදීම අපරාධකරුවන් අපරාධ සිදුකරන අතරතුර මිනීමැරුම් සිදු කිරීමට පවා පෙළඹී ඇති බවත් පොලීසිය පෙන්වා දෙයි.
පොලීසිය නිකුත් කළ ආරක්ෂක උපදෙස් මාලාව
මෙම තත්ත්වය හමුවේ තනිව ජීවත් වන වැඩිහිටියන් ආරක්ෂා කිරීම සඳහා අමතර පූර්ව ආරක්ෂක පියවර ගන්නා ලෙස පවුල්වල සාමාජිකයන්ගෙන් සහ මහජනතාවගෙන් ඉල්ලා සිටිමින් පොලීසිය පහත ආරක්ෂක උපදෙස් මාලාව නිකුත් කර ඇත:
සේවකයින් බඳවා ගැනීමේදී පරීක්ෂාකාරී වීම: ගෘහ සේවකයින් හෝ රැකබලා ගන්නන් (Caregivers) සේවයේ යෙදවීමට පෙර අදාළ පොලිස් කොට්ඨාසවලින් පොලිස් නිෂ්කාශන වාර්තා ලබා ගැනීම ඇතුළුව පූර්ණ පසුබිම් පරීක්ෂාවන් සිදු කිරීම.
හදිසි ඇමතුම් අංක ප්රදර්ශනය කිරීම: පොලිස් හදිසි ඇමතුම් අංකය වන 119, සුව සැරිය ගිලන්රථ සේවය 1990, ළඟම ඇති පොලිස් ස්ථානය, අසල්වැසියන් සහ පවුලේ වෛද්යවරුන්ගේ දුරකථන අංක නිවසේ පැහැදිලිව පෙනෙන ස්ථානවල ප්රදර්ශනය කිරීම.
ප්රාදේශීය බලධාරීන් දැනුවත් කිරීම: තනිව වෙසෙන වැඩිහිටියන්ගේ ආරක්ෂාව කෙරෙහි නිසි අවධානය යොමු කිරීම තහවුරු කිරීම සඳහා අදාළ ග්රාම නිලධාරීවරයා සහ ප්රජා පොලිස් කමිටුව දැනුවත් කිරීම.
ජංගම දුරකථන ලබාදීම: හදිසි ඇමතුම් අංක කල්තියා සුරකින ලද සරල ජංගම දුරකථන වැඩිහිටි දෙමාපියන්ට ලබාදීම.
නිවසේ හා අවට ආරක්ෂාව: අසල්වැසියන් සමඟ සමීප සබඳතා පවත්වා ගැනීම, අලුත්වැඩියා කටයුතු හෝ වෙනත් සේවා සඳහා නිවසට පැමිණෙන නාඳුනන පුද්ගලයින්ගේ අනන්යතාව තහවුරු කර ගැනීම සහ රාත්රී කාලයේදී නිවස අවට ප්රදේශය ප්රමාණවත් ලෙස ආලෝකමත් කර තැබීම.
නිරන්තර සන්නිවේදනය: වැඩිහිටි දෙමාපියන් සමාජීය වශයෙන් හුදකලා වීම වැළැක්වීම සඳහා පවුලේ සාමාජිකයින් නිරන්තරයෙන් සන්නිවේදනය පවත්වා ගැනීම සහ ඔවුන් බැලීමට පැමිණීම.
අසල්වැසියන් සහ ප්රාදේශීය බලධාරීන් සමඟ සමීප සම්බන්ධීකරණයක් පවත්වා ගැනීමෙන් ඇතිවිය හැකි ආරක්ෂක තර්ජන කල්තියා හඳුනාගෙන අපරාධ වළක්වා ගැනීමට හැකි වනු ඇති බව පොලීසිය වැඩිදුරටත් සඳහන් කරයි. තනිව වෙසෙන වැඩිහිටියන්ගේ ආරක්ෂාව සහ රැකවරණය තහවුරු කිරීම සඳහා අවධානයෙන් පසුවන ලෙසත් සිය සහාය ලබාදෙන ලෙසත් පොලීසිය මහජනතාවගෙන් ඉල්ලා සිටී.




