කොළඹ වරාය නගරයේ පදිංචිකරුවන්ට පළාත් පාලන මැතිවරණවලදී ඡන්දය ප්රකාශ කිරීමට නොහැකිවීම ඔවුන්ගේ මූලික අයිතිවාසිකම් උල්ලංඝනය කිරීමක් බව යටිතල පහසුකම් හා උපායමාර්ගික සංවර්ධනය පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී එස්.එම්. මරික්කාර් මහතා පවසයි.
මෑතකදී නිලධාරීන් සමඟ පැවති සාකච්ඡාවකදී මරික්කාර් මහතා පෙන්වා දී ඇත්තේ වරාය නගරයේ පදිංචිකරුවන් කොළඹ දිස්ත්රික්කය යටතේ ලියාපදිංචිව සිටියද, පළාත් පාලන මැතිවරණවලදී ඔවුන්ට ඡන්දය ප්රකාශ කිරීමට අවස්ථාවක් නොමැති බවයි.
“ජනාධිපතිවරණයක් හෝ පාර්ලිමේන්තු මැතිවරණයක් පැවැත්වෙන විට ඔවුන්ට කොළඹ දිස්ත්රික්කය යටතේ ඡන්දය ප්රකාශ කළ හැකියි. නමුත් පළාත් පාලන මැතිවරණයකදී ඔවුන්ට ඡන්දය ප්රකාශ කිරීමට ස්ථානයක් නැහැ. මෙය ඔවුන්ගේ මූලික අයිතිවාසිකම් උල්ලංඝනය කිරීමක්,” යැයි ඔහු පවසා තිබේ.
වරාය නගරය සඳහා වෙනම පළාත් පාලන ආයතනයක් ස්ථාපිත කිරීමට සිදුවිය හැකි බවද මරික්කාර් මහතා සඳහන් කර ඇත.
කෙසේ වෙතත්, නිලධාරීන් පෙන්වා දී ඇත්තේ අභ්යන්තර කටයුතු හා පළාත් සභා සහ පළාත් පාලන අමාත්යවරයා විසින් 2019 වසරේ නිකුත් කරන ලද ගැසට් නිවේදනයක් මගින් 1995 අංක 22 දරන පරිපාලන දිස්ත්රික්ක පනතේ 3 වැනි වගන්තිය යටතේ වරාය නගර භූමිය කොළඹ පරිපාලන දිස්ත්රික්කයට ඇතුළත් කර ඇති බවයි.
එමගින් දිස්ත්රික් මට්ටමේ නියෝජනය සම්බන්ධ ගැටලුව විසඳී ඇති බව නිලධාරීන් පෙන්වා දී තිබේ.
එහෙත් මරික්කාර් මහතා ඊට ප්රතිචාර දක්වමින් සඳහන් කර ඇත්තේ අදාළ ගැසට් නිවේදනය මගින් රටපුරා පැවැත්වෙන සහ දිස්ත්රික් මට්ටමේ මැතිවරණ සඳහා වරාය නගරය ඇතුළත් කළද, පළාත් පාලන ආයතන මට්ටමේ නියෝජනය පිළිබඳ ගැටලුව ඊට විසඳිය නොහැකි බවයි.
මෙම කරුණ අධිකරණය හමුවට ගෙන ගියහොත් වරාය නගර ව්යාපෘතියේ කටයුතු ප්රමාද විය හැකි බවටද මරික්කාර් මහතා අනතුරු අඟවා තිබේ.
