කතරගම දේවාලයේ ප්‍රධාන කපු ධුරය හොබවන සොමිපාල ටී රත්නායක සහ එම දේවාලයේ භාරකරු ලෙස කටයුතු කළ සමන් ප්‍රියන්ත නොහොත් චූටි කපු මහතා සිය නිවෙස්වලින් පිටව ගොස් ඇති බවට තොරතුරු වාර්තාවෙයි.
ඒ අනුව ඔවුන් අත්අඩංගුවට ගැනීම සඳහා එම නිවෙස්වෙත ගොස් ඇති කොළඹ අපරාධ කොට්ඨාශයේ හිස් අතින් නැවත පැමිණීමට සිදුව තිබේ.
ඔවුන් දෙදෙනාම ප්‍රතිකාර සඳහා කොළඹ බලා ගොස් ඇති බවත් යළි පැමිණීමෙන් අනතුරුව ඒ බව දැනුම්දෙන බවත් එම නිවෙස් හිමියන් අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමට පවසා තිබේ.
ඓතිහාසික රුහුණු කතරගම මහා දේවාලයට පූජා කර තිබූ පවුම් 38ක් බර රන් තැටියක් අස්ථානගත කිරීමේ සිදුවීමකට අදාළ විමර්ශනවලට අනුව තිස්සමහාරාම අධිකරණය වෙත කරුණු වාර්තා කර ඒ පිළිබඳව නීතිපතිවරයා දැනුවත් කිරීමෙන් අනතුරුව උපදෙස් ලැබී ඇත්තේ ඔවුන් දෙදෙනා අත්අඩංගුවට ගන්නා ලෙසටය.
ඉන්දියාවේදී මියගිය බවට වාර්තා වූ අංගොඩ ලොක්කා නමැති සංවිධානාත්මක අපරාධකරුගේ බිරිඳ විසින් 2019 වසරේදී මෙම රන් තැටිය කතරගම දේවාලය වෙත පූජා කර තිබුණි.
එම අවස්ථාවේ තේවාව භාරව සිට ඇත්තේ කතරගම දේවාලයේ ප්‍රධාන කපු ධුරය හොබවන සොමිපාල ටී රත්නායක මහතාය.
විමර්ශනවලදී අනාවරණය වී ඇත්තේ පසුව එම රන් තැටිය කපු මහතාගේ කාමරයේ තබා ඇති බවය.
කෙසේ වෙතත් මෙම රන් තැටිය අස්ථානගතව ඇති බවට ඓතිහාසික රුහුණු කතරගම මහා දේවාලයේ බස්නායක නිලමේවරයාට ලද තොරතුරකට අනුව එවකට පොලිස්පතිවරයාට සිද්ධිය සම්බන්ධයෙන් පැමිණිලි කර තිබේ.
පසුව වත්මන් වැඩබලන පොලිස්පති දේශබන්දු තෙන්නකෝන් මහතාගේ උපදෙස් අනුව සිද්ධිය සම්බන්ධයෙන් කොළඹ අපරාධ කොට්ඨාශය විමර්ශන ආරම්භ කර ඇත.
