ජාත්‍යන්තර පොලිස් සංගමයේ (IPA) 69 වැනි ලෝක සමුළුව ආසියානු රටක පැවැත්වෙන පළමු අවස්ථාව සනිටුහන් කරමින් ශ්‍රී ලංකාවේදී පැවැත්වේ.
මෙම සමුළුව ඊයේ (21) කොළඹදී නිල වශයෙන් ආරම්භ වූ අතර, විදේශ කටයුතු අමාත්‍ය විජිත හේරත් මහතා ප්‍රධාන ආරාධිතයා ලෙස ඊට සහභාගි විය.
පොලිස්පතිවරයා මෙන්ම ජාත්‍යන්තර පොලිස් සංගමයේ ශ්‍රී ලංකා අංශයේ සභාපතිවරයා ද වන ප්‍රියන්ත වීරසූරිය මහතා ද මෙම අවස්ථාවට එක්ව සිටියේය.
ඔක්තෝබර් 20 වැනිදා සිට 25 වැනිදා දක්වා පැවැත්වෙන මෙම සමුළුවට රටවල් 69ක් නියෝජනය කරමින් නියෝජිතයන් 400කට අධික පිරිසක් සහභාගි වෙති. ජාත්‍යන්තර සහයෝගීතාව ශක්තිමත් කිරීම සහ සංස්කෘතික හුවමාරුව ප්‍රවර්ධනය කිරීම සඳහා මෙම සමුළුව වේදිකාවක් සපයයි.
සමුළුව අමතමින් විදේශ කටයුතු අමාත්‍ය විජිත හේරත් මහතා, දේශසීමා ඉක්මවා සිදුවන අපරාධ, සංවිධානාත්මක අපරාධ ජාල සහ නීතිය ක්‍රියාත්මක කිරීමේදී මතුවන නව අභියෝගවලට මුහුණ දීම සඳහා ජාත්‍යන්තර සහයෝගීතාවයේ වැදගත්කම අවධාරණය කළේය.
ශ්‍රී ලංකාවට පැමිණි විදේශීය නියෝජිතයන් පිළිගත් අමාත්‍යවරයා, ඔවුන් මෙරට රැඳී සිටින කාලය තුළ ශ්‍රී ලංකාවේ ස්වභාවික සුන්දරත්වය, සංස්කෘතික උරුමය සහ ආගන්තුක සත්කාරය අත්විඳින ලෙසද ආරාධනා කළේය.
ජාත්‍යන්තර පොලිස් සංගමය යනු ලොව පුරා සාමාජිකයන් 600,000කට අධික සංඛ්‍යාවක් සිටින රාජ්‍ය නොවන සංවිධානයකි. දැනට සේවයේ නියුතු සහ විශ්‍රාමික පොලිස් නිලධාරීන් අතර වෘත්තීය, සමාජීය හා සංස්කෘතික සහයෝගීතාව ප්‍රවර්ධනය කිරීම එහි ප්‍රධාන අරමුණ වේ.
“Servo per Amikeco” යන ආදර්ශ පාඨය යටතේ ක්‍රියාත්මක වන එහි අර්ථය වන්නේ “මිත්‍රත්වය තුළින් සේවය” යන්නයි. ජාත්‍යන්තර පොලිස් සංගමයේ වත්මන් ලෝක සභාපතිවරයා වන්නේ මාටින් හොෆ්මන් මහතාය.
ලෝක සමුළුවෙන් අනතුරුව ඔක්තෝබර් 25 වැනිදා සිට 31 වැනිදා දක්වා ජාත්‍යන්තර පොලිස් සංගමයේ මිත්‍රත්ව සතිය පැවැත්වීමට නියමිතය. එම කාලය තුළ විදේශීය නියෝජිතයන්ට ශ්‍රී ලංකාවේ ඓතිහාසික ස්ථාන, සංස්කෘතික ආකර්ෂණීය ස්ථාන, ස්වභාවික පරිසරය, දේශීය ආහාර සහ සම්ප්‍රදායන් හඳුන්වා දීමේ අරමුණින් දිවයින පුරා සංචාර සංවිධානය කර තිබේ.
