අඛණ්ඩ මෙහෙයුම් ක්‍රියාකාරකම් සහිත කේන්ද්‍රස්ථානයක් සහ ජාත්‍යන්තර වෙළඳ හා නාවික මධ්‍යස්ථානයක් ලෙස ප්‍රධාන කාර්යභාරයක් ඉටු කරන වරායේ හැකියාවන් වැඩිදියුණු කිරීම සඳහා ශ්‍රී ලංකා වරාය අධිකාරියේ විමර්ශන මධ්‍යස්ථානයක් ඊයේ විවෘත කෙරිණි.
විමර්ශන මධ්‍යස්ථානය වරාය, නාවික හා ගුවන් සේවා අමාත්‍ය නිමල් සිරිපාල ද සිල්වා මහතා අතින් විවෘත විය.
කොළඹ වරායට සම්බන්ධ දෙස් විදෙස් පාරිභෝගිකයන් සඳහා වඩාත් කඩිනම් සහ පහසු අයුරින් වරාය සේවා පිළිබඳ තොරතුරු ලබාදීමේ අරමුණින් සහ වරාය මෙහෙයුම් පිළිබඳව ජනතාව දැනුවත් කිරීමේ සහ පිළිගැනීමේ අරමුණින් මෙම මධ්‍යස්ථානය ස්ථාපිත කර ඇති බව ඔහු පැවසීය.
මෙම මධ්‍යස්ථානය දිනපතා පෙ.ව. 8:30 සිට සවස 5:00 දක්වා විවෘතව පවතින අතර, 1984 ක්ෂණික ඇමතුම් අංකය හරහා වරාය සේවා තොරතුරු ලබාදේ.
විශේෂයෙන්ම ආනයන, අපනයන සහ නැව්ගත කිරීමේ කටයුතුවල නියැලී සිටින පුද්ගලයින් සඳහා මෙම ක්ෂණික ඇමතුම් අංකය පහසු වනු ඇත. එපමනක් නොව, සමුද්‍රීය, නාවික සහ වරාය ක්ෂේත්‍ර කෙරෙහි උනන්දුවක් දක්වන ඕනෑම අයෙකුට හෝ මෙම ක්ෂේත්‍රවලට අදාළ තොරතුරු සොයන අයට ක්ෂණික ඇමතුම් අංකය හරහා අදාළ තොරතුරු වෙත ප්‍රවේශ විය හැක.
අමතර තොරතුරු සඳහා විමසන ඕනෑම අයෙකුට, අංක 15, ලෝටස් පාර, ඇල අංගනය, කොළඹ 01 යන ස්ථානයේ පිහිටි ශ්‍රී ලංකා වරාය අධිකාරියේ විමර්ශන මධ්‍යස්ථානය වෙත පිවිසිය හැක. එසේත් නැතිනම්, තොරතුරු සඳහා විමසීම් [email protected] විද්‍යුත් තැපෑලෙන් ද ඉදිරිපත් කළ හැකිය.
