පිළියන්දල ප්රදේශයේ සිදුකළ වැටලීමකදී හෙරොයින් සහ අයිස් මත්ද්රව්ය කිලෝග්රෑම් 17කට වැඩි ප්රමාණයක් සමඟ කාන්තාවක් ඇතුළු සැකකරුවන් තිදෙනෙකු අත්අඩංගුවට ගත් බව පොලිසිය පවසයි.
පොලිසිය සඳහන් කළේ බස්නාහිර පළාත් උතුරු අපරාධ කොට්ඨාසයේ නිලධාරීන් විසින් පිළියන්දල පොලිස් බල ප්රදේශයට අයත් තුම්බෝවිල ප්රදේශයේදී මෙම වැටලීම සිදුකළ බවයි.
එහිදී හෙරොයින් කිලෝග්රෑම් 11.69ක් සහ අයිස් මත්ද්රව්ය කිලෝග්රෑම් 6.90ක් පොලිස් භාරයට ගෙන තිබේ.
අත්අඩංගුවට ගත් සැකකරුවන් අතර අවුරුදු 24 සහ 31 වයස්වල පසුවන පිරිමි පුද්ගලයන් දෙදෙනෙකු සහ 27 හැවිරිදි කාන්තාවක් සිටින බව පොලිසිය සඳහන් කළේය. ඔවුන් දෙහිවල, ඇඹිලිපිටිය සහ වේගොව්ව ප්රදේශවල පදිංචිකරුවන්ය.
මීට පෙර හෙරොයින් සමඟ අත්අඩංගුවට ගෙන රැඳවුම් නියෝග යටතේ රඳවා සිටින සැකකරුවෙකුගෙන් සිදුකළ ප්රශ්න කිරීම්වලදී අනාවරණය වූ තොරතුරු මත මෙම වැටලීම සිදුකර ඇති බව පොලිසිය පවසයි.
මෑතකදී අත්අඩංගුවට ගත් සැකකරුවන්ගෙන් එක් අයෙකු මත්ද්රව්ය ජාවාරමට සම්බන්ධ බවට සැක කෙරෙන අතර, අනෙක් පිරිමි පුද්ගලයා සහ කාන්තාව එම ජාවාරමට ආධාර සහ අනුබල ලබා දී ඇති බවට සැක කෙරේ.
සැකකරුවන් තිදෙනා හල්ෆ්ස්ඩෝප් මහේස්ත්රාත් අධිකරණයට ඉදිරිපත් කිරීමට නියමිත අතර, වැඩිදුර ප්රශ්න කිරීම් සඳහා ඔවුන් සම්බන්ධයෙන් රැඳවුම් නියෝග ලබාගැනීමට පොලිසිය අපේක්ෂා කරයි.
බස්නාහිර පළාත් උතුරු අපරාධ කොට්ඨාසය විසින් වැඩිදුර විමර්ශන සිදුකරනු ලබයි.
