මෑතකදී ප්‍රතිකාර ලැබූ කවන්තිස්ස ඇතාගේ මරණය සම්බන්ධයෙන් ස්වාධීන පරීක්ෂණයක් පවත්වන බව පරිසර අමාත්‍ය ආචාර්ය ධම්මික පටබැඳි මහතා පවසයි.
කිලිනොච්චියේ පැවති උත්සවයකින් අනතුරුව මාධ්‍ය වෙත අදහස් දක්වමින් අමාත්‍යවරයා සඳහන් කළේ, ඇතාට ප්‍රතිකාර කිරීමේදී කිසියම් අතපසුවීමක් සිදුවී ඇත්ද යන්නත්, සත්වයාට හානි කිරීමේ අරමුණින් කිසියම් ක්‍රියාවක් සිදුකර තිබේද යන්නත් පරීක්ෂණයේදී සොයා බලන බවයි.
ඇතාට ප්‍රතිකාර කිරීම සඳහා පශු වෛද්‍ය කණ්ඩායම හැකි සෑම උත්සාහයක්ම ගෙන තිබුණද, සත්වයාගේ ජීවිතය බේරා ගැනීමට නොහැකි වීම පිළිබඳව කනගාටුව පළ කරන බවද අමාත්‍යවරයා පැවසීය.
පශු වෛද්‍ය සේවාවන් සහ වනජීවී සංරක්ෂණ දෙපාර්තමේන්තුව මගින් රෝගී සතුන්ට ප්‍රතිකාර කිරීමේ ක්‍රියාවලිය තවදුරටත් වැඩිදියුණු කිරීමට පරිසර අමාත්‍යාංශය පියවර ගන්නා බවද ඔහු සඳහන් කළේය.
අදාළ බලධාරීන්ගේ දැනුවත්භාවයකින් තොරව ඇතාට හිතාමතා හානි සිදුකර තිබේද යන්න පිළිබඳවද පරීක්ෂණයේදී සොයා බලන බව අමාත්‍යවරයා වැඩිදුරටත් පැවසීය.
කිසියම් අක්‍රමිකතාවක් හෝ වරදක් අනාවරණය වුවහොත් ඒ සම්බන්ධයෙන් දැඩි ක්‍රියාමාර්ග ගන්නා බවද ඔහු අවධාරණය කළේය.
