නීති විරෝධී ලෙස මෙරටට පැමිණි ඉන්දීය තරුණයා නිරෝධායනයට
ඉන්දියාවේ තමිල්නාඩු ප්‍රාන්තයේ සිට නීතිවිරෝධිව මෙරට පැමිණි තරුණයෙකු නිරෝධායනයට යොමු කර තිබේ.
යාපනය පොලීසිය සහ සෞඛ්‍ය අංශ විසින් අදාළ තරුණයා නිරෝධායනයට යොමු කර ඇති බව පොලිස් මාධ්‍ය ප්‍රකාශක, ජ්‍යෙෂ්ඨ නියෝජ්‍ය පොලිස්පති අජිත් රෝහණ මහතා පැවසුවේය.
පසුගිය 08 වනදා අදාළ තරුණයා තමිල්නාඩු ප්‍රාන්තයේ සිට ධීවර යාත්‍රාවකින් පැමිණ යාපනය ගුරුනගර් ප්‍රදේශයේ ඥාති නිවසක සැඟව සිටින බවට ලද තොරතුරක් මත ඔහු ලබන 23 වන දින දක්වා නිරෝධායනයට යොමු කර තිබේ.
නිරෝධායන කාලසීමාව අවසන් වීමෙන් අනතුරුව අදාල පුද්ගලයාට එරෙහිව ආගමන විගමන පනත යටතේ මෙන්ම නිරෝධායන රීතීන් යටතේ නඩු පැවරීමට නියමිත බව අජිත් රෝහණ මහතා සඳහන් කළේය.
