ගෑස් තියාගෙන “ගෑස් නෑ” කී මහනුවර ලිට්‍රෝ වෙළෙන්දාට උසාවියෙන් දඩ: සිලින්ඩර 28ම රාජසන්තක කරයි!
ප්‍රමාණවත් තරම් ගෑස් තොග පවතිද්දී පාරිභෝගිකයින් වෙත ගෑස් අලෙවි කිරීම අසත්‍ය හේතු දක්වමින් ප්‍රතික්ෂේප කළ මහනුවර ප්‍රදේශයේ බලයලත් ලිට්‍රෝ ගෑස් අලෙවි නියෝජිතයෙකුට මහනුවර මහේස්ත්‍රාත් අධිකරණය මඟින් දඩ නියම කර තිබේ.
මීට අමතරව, පාරිභෝගික කටයුතු පිළිබඳ අධිකාරියේ (CAA) නිලධාරීන් විසින් අදාළ වෙළෙඳසැල වටලා සොයාගන්නා ලද කිලෝග්‍රෑම් 12.5 ප්‍රමාණයේ ලිට්‍රෝ ගෑස් සිලින්ඩර 28ම රජයට රාජසන්තක කිරීමටද මහේස්ත්‍රාත්වරයා නියෝග කළේය.
මහනුවර, කොටුගොඩැල්ල වීදියේ පිහිටි ‘ඩී.ඩී. ගුරුසිංහ ට්‍රේඩිං’ (D.D. Gurusinghe Trading) නමැති බලයලත් ලිට්‍රෝ ගෑස් අලෙවිසැල පවත්වාගෙන ගිය ව්‍යාපාරිකයාට එරෙහිව මෙම නීතිමය පියවර ගෙන ඇත.
උපාය දූතයෙකු යොදවා කළ හදිසි වැටලීම
පාරිභෝගික අධිකාරිය සඳහන් කරන්නේ, අදාළ වෙළෙඳසැල තුළ ගෑස් තිබියදීත් පාරිභෝගිකයින්ට ගෑස් ලබා නොදෙන බවට ලද පැමිණිලි මත පසුගිය ඔක්තෝබර් 29 වැනිදා මෙම වැටලීම සිදුකළ බවයි.
එහිදී පාරිභෝගික අධිකාරියේ විමර්ශන නිලධාරියෙකු සාමාන්‍ය ගැණුම්කරුවෙකු ලෙස වෙස්වලාගෙන ගොස් කිලෝග්‍රෑම් 12.5ක ගෑස් සිලින්ඩරයක් මිලදී ගැනීමට උත්සාහ කර තිබේ. එම අවස්ථාවේදී වෙළෙන්දා ප්‍රකාශ කර ඇත්තේ තමන් සතුව අලෙවි කිරීමට කිසිදු ගෑස් සිලින්ඩරයක් නොමැති බවයි.
කෙසේවෙතත්, නිලධාරීන් වහාම ක්‍රියාත්මක වී වෙළෙඳසැල් පරිශ්‍රය සෝදිසි කිරීමේදී සඟවා තිබූ කිලෝග්‍රෑම් 12.5ක පූර්ණ ලිට්‍රෝ ගෑස් සිලින්ඩර 28ක තොගයක් හමුවී ඇත. එම ගෑස් සිලින්ඩර සියල්ල නිලධාරීන් භාරයට ගෙන වෙළෙන්දාට එරෙහිව මහනුවර මහේස්ත්‍රාත් අධිකරණය හමුවේ නඩු පවරන ලදී.
තොග සඟවාගෙන බොරු කීම නීතිවිරෝධීයි
2003 අංක 09 දරන පාරිභෝගික කටයුතු පිළිබඳ අධිකාරී පනතේ 16(අ) වගන්තිය ප්‍රකාරව, අලෙවිය සඳහා භාණ්ඩ තොග ළඟ තබාගෙන සිටියදී ඒවා නොමැති බවට පාරිභෝගිකයින්ට ව්‍යාජ ලෙස ප්‍රකාශ කිරීම හෝ අලෙවිය ප්‍රතික්ෂේප කිරීම බරපතළ වරදකි.
කෘත්‍රිම භාණ්ඩ හිඟයක් මවමින් පාරිභෝගිකයින් නොමඟ යවන, භාණ්ඩ සඟවන සහ අසාධාරණ වෙළෙඳ පිළිවෙත්වල නිරත වන ව්‍යාපාරිකයින් කොටුකර ගැනීම සඳහා දිවයින පුරා අඛණ්ඩ වැටලීම් ක්‍රියාත්මක කරන බව පාරිභෝගික අධිකාරිය අවධාරණය කරයි. මෙවැනි අසාධාරණ වෙළෙඳ කටයුතු පිළිබඳ තොරතුරු ඇත්නම් කාර්යාල වේලාවන් තුළදී 1977 ක්ෂණික දුරකථන අංකය ඔස්සේ දැනුම් දෙන ලෙසද මහජනතාවගෙන් ඉල්ලා සිටියි.
