ප්‍රදේශයේ සිදුවූ සොරකම් රැසකට සම්බන්ධ බව කියමින් ගම්වාසීන් පිරිසක් විසින් අල්ලා පොලිසියට භාරදුන් සැකකරුවෙකු, කොබෙයිගනේ පොලිස් අත්අඩංගුවේ පසුවෙද්දී රෝහල්ගත කිරීමෙන් අනතුරුව මියගොස් ඇති අතර, සිද්ධිය සම්බන්ධයෙන් ඔහුව අල්ලා භාරදුන් ගම්වැසියන් පස්දෙනෙකු පොලිසිය විසින් අත්අඩංගුවට ගෙන තිබේ.
වාර්තා වන අන්දමට, කොබෙයිගනේ බැද්දේගම ප්‍රදේශයේ පදිංචිකරුවන් පිරිසක් විසින් පසුගිය ඔක්තෝබර් 25 වැනි දින මෙම සැකකරුව අල්ලා කොබෙයිගනේ පොලිස් ස්ථානය වෙත භාරදී ඇත.
පොලිස් භාරයේ දින දෙකක කාලයක් රඳවාගෙන සිටි මෙම සැකකරු ඔක්තෝබර් 27 වැනි දින නිකවැරටිය රෝහලට ඇතුළත් කර ඇති අතර, එහිදී ඔහු ප්‍රතිකාර ලබමින් සිටියදී ජීවිතක්ෂයට පත්ව තිබේ.
අල්ලා දුන් ගම්මුන් පස්දෙනා හිරේට
සැකකරුගේ අවාසනාවන්ත මරණයත් සමඟ, ඔහුව අල්ලා පොලිසියට භාරදීමට මුල්වූ බව කියන ගම්වැසියන් පස්දෙනෙකු කොබෙයිගනේ පොලිසිය විසින් සැකපිට අත්අඩංගුවට ගෙන ඇත.
කෙසේවෙතත්, අත්අඩංගුවට ගත් ගම්වැසියන්ගේ ඥාතීන් පොලිසියේ මෙම ක්‍රියාකලාපය පිළිබඳව දැඩි විරෝධය සහ කනස්සල්ල පළ කර සිටියි. ඔවුන් පවසන්නේ ගම්වාසීන් විසින් අදාළ සැකකරුව පොලිසියට භාරදෙන අවස්ථාවේදී ඔහුගේ සිරුරේ කිසිදු තුවාලයක් හෝ හානියක් නොතිබූ බවයි.
ඥාතීන් නඟන බරපතළ චෝදනා
අත්අඩංගුවට ගත් ගම්වැසියන්ගේ ඥාතීන් වැඩිදුරටත් හෙළි කරන්නේ, සැකකරු කොටුකර ගැනීමෙන් අනතුරුව ගසක බැඳ තැබූ බව සත්‍යයක් වුවද, පැයක පමණ කෙටි කාලයක් ඇතුළත ඒ පිළිබඳව පොලිසිය දැනුවත් කර ඔහුව කිසිදු උපද්‍රවයකින් තොරව ආරක්ෂිතව පොලිසියට භාරදුන් බවයි.
ගම්මුන් අල්ලා ගැනීමේදී ඔහුට බරපතළ තුවාල සිදුවූයේ නම්, ඔහුව පොලිස් භාරයට ගත් විගස රෝහල්ගත නොකර දින දෙකක් පුරා පොලිස් ස්ථානයේ රඳවා තබාගත්තේ මන්දැයි ඥාතීහු ප්‍රශ්න කරති.
මීට අමතරව, මියගිය මෙම පුද්ගලයා සිදුකළ සොරකම් සම්බන්ධයෙන් මීට පෙර අවස්ථා ගණනාවකදීම පොලිසිය දැනුවත් කර තිබූ බවත්, ඔහුව අල්ලා පොලිසියට භාරදෙන ලෙස ගම්වැසියන්ට උපදෙස් ලබාදී තිබුණේද පොලිසිය විසින්ම බවත් ඥාතීහු වැඩිදුරටත් චෝදනා කරති.
සිද්ධිය සම්බන්ධයෙන් ප්‍රදේශයේ දැඩි නොසන්සුන්කාරී වාතාවරණයක් මතුව ඇති අතර වැඩිදුර විමර්ශන ක්‍රියාත්මකය.
