පාකිස්තානයේ හිටපු අග්රාමාත්ය ඉම්රාන් ඛාන් ඉස්ලාමාබාද්හි ෂිෆා ජාත්යන්තර රෝහලේ වෛද්ය පරීක්ෂණයකින් අනතුරුව යළි අඩියාලා බන්ධනාගාරය වෙත රැගෙන ගොස් තිබේ.
ඔහුගේ පාකිස්තාන් තෙහ්රීක්-ඊ-ඉන්සාෆ් (PTI) පක්ෂයේ ප්රකාශකයෙකු මේ බව තහවුරු කර ඇත.
පාකිස්තාන මාධ්ය වාර්තාවලට අනුව, අක්ෂි විශේෂඥයෙකු, හෘද රෝග විශේෂඥයෙකු සහ වෛද්යවරයෙකු ඇතුළු විශේෂඥ වෛද්ය කණ්ඩායමක් ඔහුගේ සවිස්තරාත්මක වෛද්ය පරීක්ෂණයක් සිදු කර ඇති අතර, බන්ධනාගාරයේ රඳවා තැබීමට ඔහු සුදුසු බව තීරණය කර තිබේ.
පාකිස්තාන තොරතුරු අමාත්ය අටාවුල්ලා තාරාර් සඳහන් කළේ වෛද්ය පරීක්ෂණ අවසන් කිරීමෙන් අනතුරුව ඛාන් යළි අඩියාලා බන්ධනාගාරයට මාරු කළ බවයි.
73 හැවිරිදි හිටපු අග්රාමාත්යවරයා අඟහරුවාදා ශ්රේෂ්ඨාධිකරණය ලබාදුන් නියෝගයකින් අනතුරුව මධ්යම රාත්රිය ආසන්නයේ රෝහලට රැගෙන ගොස් තිබුණි. සෞඛ්ය තත්ත්වය පිළිබඳ මතුවූ ගැටලු හේතුවෙන් විශේෂඥ වෛද්ය ප්රතිකාර ලබාදෙන ලෙස ශ්රේෂ්ඨාධිකරණය බලධාරීන්ට නියෝග කර තිබුණි.
ඛාන් බන්ධනාගාරයට රැගෙන යාම සහ රෝහල වෙත ගෙන ඒම දැඩි ආරක්ෂක විධිවිධාන යටතේ සිදු කළ බව Geo News වාර්තා කර ඇත. මේ වනවිට ඔහු බන්ධනාගාරයේ සිය කුටිය වෙත යොමු කර තිබේ.
ඛාන් රෝහලේ රැඳී සිටි කෙටි කාලය තුළ PTI ආධාරකරුවන් විශාල පිරිසක් රෝහල ආසන්නයේ රැස්ව සිටි බව AFP පුවත් සේවය වාර්තා කළේය.
රෝහල්ගත කළේ ඇයි?
ඉම්රාන් ඛාන් 2023 අගෝස්තු මාසයේ සිට බන්ධනාගාරගතව සිටී. ඔහුට එරෙහි නඩු දේශපාලනික අරමුණු මත පවරා ඇති බව ඛාන් පවසන අතර, පාකිස්තාන රජය එම චෝදනා ප්රතික්ෂේප කරයි.
ඔහුගේ නීතිඥයන් පවසන්නේ බන්ධනාගාරගතව සිටියදී ඔහුගේ සෞඛ්ය තත්ත්වය පිරිහී ඇති අතර දකුණු ඇසේ පෙනීමද සැලකිය යුතු ලෙස අඩුවී ඇති බවයි.
අඟහරුවාදා ලබාදුන් නියෝගයකින් පාකිස්තාන ශ්රේෂ්ඨාධිකරණය ඛාන් පැය 48ක් ඇතුළත ඉස්ලාමාබාද්හි ෂිෆා ජාත්යන්තර රෝහලට මාරු කරන ලෙසත්, ඔහුගේ පෞද්ගලික වෛද්යවරයා ඇතුළත් වෛද්ය කණ්ඩායමකට ඔහු පරීක්ෂා කිරීමට අවස්ථාව ලබාදෙන ලෙසත් නියෝග කර තිබුණි.
රජය මුලින් එම නියෝගය ක්රියාත්මක කරන බව ප්රකාශ කළද පසුව එය නැවත සලකා බලන ලෙස ශ්රේෂ්ඨාධිකරණයෙන් ඉල්ලා පෙත්සමක් ගොනු කළේය. ඛාන්ට ක්ෂණික ප්රතිකාර අවශ්ය වන සෞඛ්ය තත්ත්වයක් වෛද්ය වාර්තාවලින් හෙළි වී නොමැති බවද රජය පවසා තිබේ.
ඛාන් රෝහලට මාරු කිරීමට විරෝධය පළ කළ පාකිස්තාන නීති අමාත්ය අසාම් නසීර් තාරාර්, වරදකරුවෙකු ලෙස බන්ධනාගාරගතව සිටින පුද්ගලයෙකුට නීතිය අනුව බන්ධනාගාරය තුළ හෝ රජයේ රෝහලකදී ප්රතිකාර ලබාදිය යුතු බව පවසා තිබුණි.
කෙසේ වෙතත්, PTI පක්ෂය රජය ශ්රේෂ්ඨාධිකරණ නියෝගය ක්රියාත්මක නොකළහොත් අධිකරණයට අපහාස කිරීමේ පෙත්සමක් ගොනු කරන බවට අනතුරු ඇඟවීමෙන් පසුව ඛාන් රෝහලට රැගෙන යාම සිදුවිය.
පසුව පාකිස්තාන පාර්ලිමේන්තු කටයුතු අමාත්ය තාරික් ෆසාල් චෞද්රි පැවසුවේ ශ්රේෂ්ඨාධිකරණ නියෝගයට රජය සම්පූර්ණයෙන්ම අනුකූල වන බවත්, නියෝගය නොසලකා හැරීමට හෝ ක්රියාත්මක කිරීම ප්රමාද කිරීමට රජයට කිසිදු අදහසක් නොතිබූ බවත්ය.
