ඉන්ධන මිල අඩු කළද පොදු ප්‍රවාහන සේවාවල නිරත බස් සහ ත්‍රිරෝද රථ ගාස්තු අඩු නොකරන බව බස් හා ත්‍රිරෝද රථ සංගම් පවසයි.
අද රාත්‍රී 09 සිට ඔක්ටේන් 92 පෙට්‍රල් සහ ඔටෝ ඩීසල් මිල අඩු කරන බව බලශක්ති අමාත්‍ය කාංචන විජේසේකර මහතා ප්‍රකාශ කළේය.
කෙසේ වෙතත්, ජාතික ගමනාගමන කොමිෂන් සභාවේ අධ්‍යක්ෂ ජනරාල් වෛද්‍ය නිලාන් මිරැන්ඩා පැවසුවේ ඩීසල් මිල අඩු කිරීමට සමගාමීව බස් ගාස්තු අඩු නොකරන බවයි.
බස් ගාස්තු අඩු කිරීමට නම් ඩීසල් මිල 4% කින් හෝ ඊට වැඩි ප්‍රමාණයකින් අඩු කළ යුතු බව පවසන වෛද්‍ය නිලාන් මිරැන්ඩා මහතා පැවසුවේ දැනට පවතින මිල අඩු කිරීම අවශ්‍ය 4% ට වඩා අඩු බවයි.
මේ අතර, ඔක්ටේන් 92 පෙට්‍රල් මිල අඩු කළද ත්‍රිරෝද රථ ගාස්තු අඩු කිරීමේ හැකියාවක් නොමැති බව සමස්ත ලංකා ත්‍රිරෝද රථ රියදුරන්ගේ සහ හිමිකරුවන්ගේ සංගමයේ සභාපති සුදිල් ජයරුක් මහතා පැවසීය.
සුදිල් ජයරුක් පෙන්වා දුන්නේ ගාස්තු සංශෝධනයක් සිදු කිරීමට නම් දැනට ත්‍රිරෝද රථ සඳහා ලබාදෙන ඉන්ධන කෝටාව වැඩි කළ යුතු බවයි.
දැනට පවතින සතිපතා ඉන්ධන කෝටාව වන ලීටර් 5 දෛනික පදනමින් ලබාදෙන ලෙස රජයෙන් ඉල්ලීමක් කරන බවද ඒ මහතා වැඩිදුරටත් පැවසීය.
ඔවුන්ට ලබාදෙන ඉන්ධන කෝටාව වැඩි කළහොත් ත්‍රිරෝද රථ ගාස්තු නියත වශයෙන්ම අඩුවන බවද සුදිල් ජයරුක් මහතා පැවසීය.
