කඩදාසි භාවිතයෙන් තොර රේගු ප්‍රකාශන ක්‍රමවේදයක් හඳුන්වාදීමේ වැඩසටහන යටතේ, CBHQ1 කාර්යාල කේතය යටතේ සිදුකරන සම්පූර්ණ බහාලුම් (FCL) ආනයන සඳහා ලේඛන අතින් භාරගැනීම 2026 ඔක්තෝබර් 19 වැනිදා සිට නතර කරන බව ශ්‍රී ලංකා රේගුව නිවේදනය කර තිබේ.
නිවේදනයක් නිකුත් කරමින් ශ්‍රී ලංකා රේගුව සඳහන් කළේ, FCL ආනයන සඳහා රේගු ප්‍රකාශන (CusDecs) කඩදාසි භාවිතයෙන් තොරව සැකසීමේ ක්‍රමවේදය 2026 ඔක්තෝබර් 1 වැනිදා නිල වශයෙන් ආරම්භ කළ බවයි.
නව ක්‍රමවේදය භාවිත කිරීමට සියලු ආනයනකරුවන් ඩිජිටල් අත්සනක් ලබාගෙන, අවශ්‍ය ලියාපදිංචි කටයුතු ඔක්තෝබර් 19 වැනිදාට පෙර සම්පූර්ණ කළ යුතුය.
මේ වන විට ආනයනකරුවන් 2,000කට ආසන්න පිරිසක් ඩිජිටල් අත්සන් ලබාගෙන ඇති නමුත්, සැලකිය යුතු පිරිසක් තවමත් ලියාපදිංචි කටයුතු අවසන් කර නොමැති බව රේගුව පවසයි.
ඩිජිටල් අත්සන් සඳහා දැනටමත් ලියාපදිංචි වී ඇති ආනයනකරුවන් ඔක්තෝබර් 19 වැනිදාට පෙර සිටම කඩදාසි භාවිතයෙන් තොර ක්‍රමවේදය අනිවාර්යයෙන් භාවිත කළ යුතු බවද රේගුව අවධාරණය කරයි. ඒ අනුව, ඔවුන් තවදුරටත් ලේඛන අතින් භාර නොදිය යුතුය.
නියමිත කාලසීමාවට පෙර ඩිජිටල් අත්සන් ලියාපදිංචිය සම්පූර්ණ කර නව ක්‍රමවේදයට අනුගත වන ලෙස ශ්‍රී ලංකා රේගුව ඉතිරි සියලු ආනයනකරුවන්ගෙන් ඉල්ලා සිටී.
