ශ්‍රී ලංකාවේ ප්‍රධාන ආගමික ස්ථාන කිහිපයකට බෝම්බ ප්‍රහාර එල්ල කරන බවට තර්ජනාත්මක WhatsApp පණිවිඩ සංසරණය කළ බවට චෝදනා එල්ල වී ඇති ඉබ්බාගමුව ප්‍රදේශයේ 21 හැවිරිදි තරුණයෙකු රිමාන්ඩ් භාරයට පත් කර තිබේ.
රංගිරි දඹුලු ලෙන් විහාරයේ විහාරාධිපති පූජ්‍ය ආචාර්ය දනිගම අනන්ද හිමියන් විසින් අපරාධ පරීක්ෂණ දෙපාර්තමේන්තුවට (CID) ඉදිරිපත් කළ ලිඛිත පැමිණිල්ලක් මත මෙම විමර්ශනය ආරම්භ කර ඇත.
එම පැමිණිල්ලට අනුව, WhatsApp සමූහයක සංසරණය වූ බව කියන පණිවිඩවල බුදුන් වහන්සේට අපහාස වන ආකාරයේ කරුණු මෙන්ම ප්‍රධාන ආගමික ස්ථාන කිහිපයකට බෝම්බ ප්‍රහාර එල්ල කරන බවට තර්ජනාත්මක ප්‍රකාශද ඇතුළත් වී තිබේ.
ශ්‍රී දළදා මාලිගාව, ජය ශ්‍රී මහා බෝධිය, ථූපාරාමය සහ දඹුලු ලෙන් විහාරය ඇතුළු ප්‍රධාන ආගමික ස්ථාන කිහිපයක් එලෙස ඉලක්ක කර තිබූ බවට පැමිණිල්ලේ සඳහන් වේ.
අනතුරුව අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසයේ නිලධාරීන් සිදු කළ විමර්ශනවලදී එම පණිවිඩ ඉබ්බාගමුව ප්‍රදේශයේ පදිංචි 21 හැවිරිදි තරුණයෙකු වෙත සම්බන්ධ වන බවට අනාවරණය කරගෙන තිබේ.
සැකකරුගේ ජංගම දුරකථනය පරීක්ෂා කිරීමේදී බුදුන් වහන්සේගේ විකෘති කරන ලද රූප නිරූපණය කරන ඡායාරූප කිහිපයක්ද සොයාගෙන ඇති බව පොලිසිය සඳහන් කළේය.
විමර්ශන නිලධාරීන් සිදු කළ ප්‍රශ්න කිරීම්වලදී සැකකරු පවසා ඇත්තේ තමන් එම කරුණු සංසරණය කර ඇත්තේ විනෝදය සඳහා බවයි.
සැකකරු කොළඹ මහේස්ත්‍රාත් අධිකරණයට ඉදිරිපත් කිරීමෙන් අනතුරුව ඔක්තෝබර් 10 වැනිදා දක්වා රිමාන්ඩ් භාරයට පත් කර තිබේ.
