වගා ව්‍යාපෘතිවල ආයෝජනය කිරීම සඳහා ජනතාවගෙන් ලබාගත් මුදල් ඇතැම් සමාගම් විසින් පුවත්පත්, සුපිරි වෙළෙඳසැල් සහ සංචාරක ව්‍යාපාර ආරම්භ කිරීමට මෙන්ම ප්‍රසංග සංවිධානය කිරීමට සහ ක්‍රිකට් තරග සඳහා අනුග්‍රහය දැක්වීමට යොදාගෙන ඇති බව ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා ඊයේ පැවසීය.
ඇතැම් අවස්ථාවල එම මුදල්වලින් කොටසක් කලාකරුවන්ට තෑගි ලෙස ලබාදී ඇති බවත්, තවත් මුදල් ප්‍රචාරණ කටයුතු සඳහා වැය කර ඇති බවත් මහ බැංකු අධිපතිවරයා සඳහන් කළේය.
වගා ආයෝජන ප්‍රවර්ධනය කිරීම සඳහා මෙම සමාගම් විසින් ඇතැම් සමාජ මාධ්‍ය බලපෑම්කරුවන්ට ගෙවා ඇති මුදල්ද ජනතාව දැඩි වෙහෙසක් දරා උපයාගත් මුදල් බව ඔහු පැවසීය.
එම බලපෑම්කරුවන් ජනතාව වෙනුවෙන් නොව, තමන්ට මුදල් ගෙවූ සමාගම් වෙනුවෙන් පෙනී සිටිමින් අදහස් පළ කර ඇති බවද ආචාර්ය වීරසිංහ මහතා සඳහන් කළේය.
නීති විරෝධී ලෙස තැන්පතු භාරගත් ගිණුම් පමණක් මහ බැංකුව විසින් මෑතකදී අත්හිටුවා ඇති බව මහ බැංකු අධිපතිවරයා පැවසීය.
වගා ආයෝජන සම්බන්ධ කිසිදු ගිණුමක් මහ බැංකුව විසින් අත්හිටුවා නොමැති බව අවධාරණය කළ ඔහු, එබැවින් මහ බැංකුව විසින් ගිණුම් අත්හිටුවීම හේතුවෙන් ගෙවීම් සිදුකිරීමට නොහැකි බවට එම සමාගම්වලට ප්‍රකාශ කළ නොහැකි බවද සඳහන් කළේය.
වගා ආයෝජන ලෙස තැන්පතු භාරගන්නා සමාගම්වලට රැවටීමෙන් වළකින ලෙස මහ බැංකුව අවස්ථා ගණනාවකදී ජනතාව දැනුවත් කර ඇති බවද ඔහු පැවසීය.
කෙසේ වෙතත්, එම සමාගම් වෙත ලැබෙන නව ආයෝජන ප්‍රමාණය අඩුවීමත් සමඟ පෙර තැන්පත්කරුවන්ට ගෙවිය යුතු මුදල් ආපසු ගෙවීමට ඔවුන්ට නොහැකි වී ඇති බවද මහ බැංකු අධිපතිවරයා සඳහන් කළේය.
නව තැන්පතු ලබා නොගෙන සියයට 40ක ප්‍රතිලාභ ලබාදීමට එම සමාගම්වලට හැකියාවක් නොමැති බවද ආචාර්ය වීරසිංහ මහතා පෙන්වා දුන්නේය.
නීති විරෝධී තැන්පතු භාරගත් ගිණුම් අත්හිටුවා ඇත්තේ අදාළ නීතිමය කටයුතු අවසන් කිරීමෙන් පසු එම මුදල් තැන්පත්කරුවන් අතර බෙදාදීමට හැකි වන පරිදි බවද ඔහු පැවසීය.
පිරමිඩ් ආකාරයේ යෝජනා ක්‍රම පවත්වාගෙන ගිය පුද්ගලයන්ට අතීතයේ අත් වූ ඉරණමට මුහුණ දීමට අවශ්‍ය නොවන්නේ නම්, වගා ආයෝජන සමාගම් නීතිය හමුවට පැමිණ තමන් නීති විරෝධී ලෙස භාරගත් තැන්පතු ජනතාවට ආපසු ගෙවීමට අපේක්ෂා කරන ආකාරය පිළිබඳ සැලැස්මක් ඉදිරිපත් කළ යුතු බව මහ බැංකු අධිපති ආචාර්ය නන්දලාල් වීරසිංහ මහතා පැවසීය.
