කොළඹ මහ නගර සභාවේ හිටපු මන්ත්‍රී මහින්ද කහඳගම මහතා ඔක්තෝබර් 26 වැනිදා දක්වා රක්ෂිත බන්ධනාගාරගත කිරීමට නියෝග කර තිබේ.
රඳවා තබාගෙන ප්‍රශ්න කරමින් සිටි කහඳගම මහතා අද අධිකරණයට ඉදිරිපත් කිරීමෙන් අනතුරුව නුගේගොඩ මහේස්ත්‍රාත් අධිකරණය මෙම නියෝගය නිකුත් කළේය.
අයිස් මත්ද්‍රව්‍ය ජාවාරමට සම්බන්ධ බවට එල්ල වී ඇති චෝදනා පිළිබඳ විමර්ශනයකින් අනතුරුව ඔක්තෝබර් 6 වැනිදා මධ්‍යම අපරාධ විමර්ශන කාර්යාංශය විසින් කහඳගම මහතා අත්අඩංගුවට ගනු ලැබීය.
අත්අඩංගුවට ගන්නා අවස්ථාවේදී ඔහු සන්තකයේ තිබී අයිස් මත්ද්‍රව්‍ය ප්‍රමාණයක් ද සොයාගෙන ඇති බවට චෝදනා එල්ල වී තිබේ.
ඉන් අනතුරුව සිදු කළ විමර්ශනවලදී, සංවිධානාත්මක මත්ද්‍රව්‍ය ජාවාරමට සම්බන්ධ බවට සැක කෙරෙන පුද්ගලයන් සමඟ කහඳගම මහතා ඩුබායිහි පැවති සාදයකට සහභාගි වී සිටින ආකාරය දැක්වෙන වීඩියෝ දර්ශන හමුවී ඇති බව ද වාර්තා වේ.
