හිටපු ඉන්දීය ක්රිකට් ක්රීඩකයෙකු සහ පුහුණුකරුවෙකු වන සංජේ බංගාර්ගේ දියණිය වන අනයා බංගාර්, 2027 මාර්තු මාසයේ සිට ඉහළ මට්ටමේ කාන්තා ක්රිකට් ක්රීඩාවට පිවිසීමේ අරමුණින් ඕස්ට්රේලියාවේ තරගකාරී ක්රිකට් පිටියට නැවත පැමිණීමට සූදානමින් සිටී.
මෙම වසරේ මුල් භාගයේදී ස්ත්රී අනන්යතාවයට අනුකූල ශල්යකර්මයකට භාජනය වූ බංගාර්ට, කාන්තා ප්රජා ක්රිකට් තරග සඳහා සහභාගී වීමට ක්රිකට් ඕස්ට්රේලියා ආයතනය අවසර ලබාදී තිබේ. ඕස්ට්රේලියාවේ විවිධ ප්රාන්ත සහ ප්රදේශවල පැවැත්වෙන ප්රිමියර් ක්රිකට් තරගාවලි ද ඊට ඇතුළත් වේ.
කෙසේ වෙතත්, ඉහළ මට්ටමේ ක්රිකට් තරග සඳහා සහභාගී වීමට මෙන්ම කාන්තා බිග් බෑෂ් ලීග් තරගාවලිය සඳහා තේරී පත්වීමේ අවස්ථාව ලබාගැනීමටද ඇය ක්රිකට් ඕස්ට්රේලියා ආයතනයේ ප්රතිපත්තිමය අවශ්යතා සපුරාලිය යුතුය.
ක්රිකට් ඕස්ට්රේලියා ආයතනයේ ප්රතිපත්තිය අනුව, ඉහළ මට්ටමේ ක්රිකට් ක්රීඩාවේ කාන්තා කාණ්ඩය යටතේ තරග කිරීමට අපේක්ෂා කරන ක්රීඩිකාවකගේ රුධිරයේ සීරම් ටෙස්ටොස්ටෙරෝන් සාන්ද්රණය අඛණ්ඩව අවම වශයෙන් මාස 12ක කාලයක් නැනෝමෝල් 10කට අඩුවෙන් පවත්වාගෙන ගොස් ඇති බව තහවුරු කළ යුතුය.
බංගාර් විසින් ඉදිරිපත් කරන ලද වෛද්ය තොරතුරු මත පදනම්ව ක්රිකට් ඕස්ට්රේලියා ආයතනය තීරණය කර ඇත්තේ මාස 12ක අවශ්ය කාලසීමාව 2027 මාර්තු මාසයේදී සම්පූර්ණ වන බවයි.
ඉන් අනතුරුව ඇයගේ ටෙස්ටොස්ටෙරෝන් මට්ටම අවශ්ය සීමාවට වඩා අඩුවෙන් පවතින බවත්, ඇය තවදුරටත් එම ප්රතිපත්තියේ අවශ්යතා සපුරාලන බවත් තහවුරු කිරීම සඳහා රුධිර පරීක්ෂණයකට භාජනය විය යුතුය.
මාධ්යවේදීන් අමතමින් බංගාර් අවධාරණය කළේ ක්රිකට් ඕස්ට්රේලියා ආයතනයේ තීරණය මගින් ඇයට ඉහළ මට්ටමේ ක්රිකට් ක්රීඩාවට පිවිසීමේ අවස්ථාව ලබාදෙන නමුත්, එය කිසිදු කණ්ඩායමක ස්ථානයක් ඇයට සහතික නොකරන බවයි.
“තරග කිරීමට සුදුසුකම් ලැබීම කියන්නේ කණ්ඩායමකට තේරී පත්වීම නොවෙයි,” යැයි ඇය පැවසුවාය. එම අවස්ථාව ලබාගැනීම සඳහා තවදුරටත් පුහුණුවීම්වල නිරත වී, තරග කර, දක්ෂතා දැක්විය යුතු බවද ඇය සඳහන් කළාය.
කාන්තා ක්රිකට් ක්රීඩාවේ ඉහළම මට්ටමට පිවිසීමත්, කාන්තා බිග් බෑෂ් ලීග් තරගාවලියට තේරී පත්වීමේ මාර්ගය ඔස්සේ ඉදිරියට යාමත් තම අභිලාෂය බව බංගාර් පැවසුවාය.
හිටපු මුම්බායි වයස් කාණ්ඩ ක්රිකට් ක්රීඩිකාවක වන බංගාර් මීට පෙර සර්ෆරාස් ඛාන් සහ මුෂීර් ඛාන් ඇතුළු ක්රීඩකයන් සමඟ එකට ක්රීඩා කර තිබේ.
කෙසේ වෙතත්, ක්රිකට් ඕස්ට්රේලියා ආයතනයේ දේශීය තරග සඳහා අදාළ ප්රතිපත්තිය ජාත්යන්තර ක්රිකට් සඳහා අදාළ වන ජාත්යන්තර ක්රිකට් කවුන්සිලයේ නීතිරීතිවලට වඩා වෙනස් වේ.
ජාත්යන්තර ක්රිකට් කවුන්සිලය 2023දී තීරණය කර තිබුණේ පිරිමි වැඩිවිය පැමිණීමේ ක්රියාවලියට ලක්වූ සංක්රාන්ති ලිංගික කාන්තාවන්ට ජාත්යන්තර කාන්තා ක්රිකට් තරග සඳහා සහභාගී වීමට සුදුසුකම් නොමැති බවයි.
