කථානායක ජගත් වික්රමරත්න මහතා විසින් සත්ව (සංශෝධන) පනත් කෙටුම්පත සඳහා සහතිකය ලබාදීමත් සමඟ ශ්රී ලංකාවේ නීතිය යටතේ “සත්වයා” යන අර්ථ දැක්වීම පුළුල් කරන නව නීතිමය සංශෝධන බලාත්මක වී තිබේ.
1958 අංක 29 දරන සත්ව පනත සංශෝධනය කරන මෙම පනත මගින් එහි 38 වැනි වගන්තියේ “සත්වයා” යන අර්ථ දැක්වීම පුළුල් කර ඇති අතර, එමගින් එළුවන්, ඌරන් සහ බැටළුවන් ද පනතේ II කොටස යටතේ පවතින විධිවිධානවලට ඇතුළත් කර තිබේ.
එමෙන්ම, පනතේ IV කොටස යටතේ පවතින අර්ථ දැක්වීම්ද සංශෝධනය කරමින් බැටළුවන්, එළුවන්, ඌරන් සහ කුකුළු වර්ග ඊට ඇතුළත් කර ඇත.
කෘෂිකර්ම, පශු සම්පත්, ඉඩම් සහ වාරිමාර්ග අමාත්යවරයා විසින් මෙම පනත් කෙටුම්පත ජූලි 21 වැනිදා පාර්ලිමේන්තුවේ පළමු වර කියවීම සඳහා ඉදිරිපත් කර තිබූ අතර, අගෝස්තු 6 වැනිදා පාර්ලිමේන්තුවේදී සම්මත විය.
කථානායකවරයාගේ සහතිකය ලබාදීමෙන් අනතුරුව එය 2026 අංක 19 දරන සත්ව (සංශෝධන) පනත ලෙස බලාත්මක වී තිබේ.
මේ අතර, අගෝස්තු 6 වැනිදා පාර්ලිමේන්තුවේදී සම්මත වූ ජාතික ජල සම්පාදන හා ජලාපවහන මණ්ඩල (සංශෝධන) පනත් කෙටුම්පතට ද කථානායකවරයා සිය සහතිකය ලබාදී ඇත.
1974 අංක 24 දරන ජාතික ජල සම්පාදන හා ජලාපවහන මණ්ඩල නීතිය සංශෝධනය කරන මෙම නව නීතිය මගින් ජල සැපයුම සහ අපජල කළමනාකරණයට අදාළව මණ්ඩලයේ බලතල සහ වගකීම් පුළුල් කර තිබේ.
කථානායකවරයාගේ සහතිකය සමඟ එය 2026 අංක 20 දරන ජාතික ජල සම්පාදන හා ජලාපවහන මණ්ඩල (සංශෝධන) පනත ලෙස බලාත්මක වී ඇත.
