‘සිරිලිය සවිය’ විමර්ශනයට අදාළව අත්අඩංගුවට ගත් හිටපු ජනාධිපති ආර්යාව ශිරන්ති රාජපක්ෂ මහත්මියට පවතින සෞඛ්‍ය ගැටලු කිහිපයක් සම්බන්ධයෙන් ඇය වෙනුවෙන් පෙනී සිටි නීතිඥවරුන් කොළඹ මහේස්ත්‍රාත් අධිකරණය හමුවේ කරුණු ඉදිරිපත් කර තිබේ.
රාජපක්ෂ මහත්මිය වෙනුවෙන් පෙනී සිටි ජනාධිපති නීතිඥ අනිල් සිල්වා මහතා අධිකරණයට සඳහන් කළේ 73 හැවිරිදි රාජපක්ෂ මහත්මිය 2019 වසරේ සිට හෘද රෝගී තත්ත්වයක් සඳහා ප්‍රතිකාර ලබන බවයි.
2021 වසරේදී ඇය මොළය සම්බන්ධ ස්කෑන් පරීක්ෂණයකටද භාජනය වී ඇති බවත්, හදිසි කරකැවිල්ල සහ ක්ලාන්ත වීම ඇතිවිය හැකි සෞඛ්‍ය තත්ත්වයකින් පෙළෙන බවත් විත්තිය සඳහන් කළේය.
එමෙන්ම ඇයට කොඳු ඇට පෙළ සම්බන්ධ සෞඛ්‍ය ගැටලුවක් සහ වරිකෝස් නහර තත්ත්වයක් පවතින බවද නීතිඥවරු අධිකරණයට දැනුම් දුන්හ.
මෙම සෞඛ්‍ය තත්ත්වයන් හේතුවෙන් ඇතැම් කටයුතු සඳහා සහාය නොමැතිව සිදුකිරීම ඇයට අපහසු බවද විත්තිය තර්ක කළේය.
රාජපක්ෂ මහත්මිය රක්ෂිත බන්ධනාගාරගත කිරීමෙන් ඇතිවන මානසික පීඩනය හේතුවෙන් ඇගේ සෞඛ්‍යයට බරපතළ අවදානමක් ඇතිවිය හැකි බවත්, ඇගේ සෞඛ්‍ය තත්ත්වයන් ඇප ලබාදීම සම්බන්ධයෙන් සුවිශේෂී තත්ත්වයන් ලෙස සලකා බලන ලෙසත් විත්තියේ නීතිඥවරු අධිකරණයෙන් ඉල්ලා සිටියහ.
කෙසේ වෙතත්, ශිරන්ති රාජපක්ෂ මහත්මිය ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට අධිකරණය නියෝග කළේය.
රිමාන්ඩ් නියෝගයෙන් අනතුරුව ජනාධිපති නීතිඥ අනිල් සිල්වා මහතා අධිකරණයට දැනුම් දුන්නේ රාජපක්ෂ මහත්මිය නාවලෝක රෝහලේදී අක්ෂි ආබාධයක් සඳහාද ප්‍රතිකාර ලබමින් සිටින බවයි. ඇයට ප්‍රතිකාර කරන වෛද්‍යවරයා හමුවී පරීක්ෂා කර ගැනීමට අවසර ලබාදෙන ලෙසද ඔහු ඉල්ලා සිටියේය.
ඒ අනුව, නියමිත වෛද්‍ය පරීක්ෂණය සඳහා ඔක්තෝබර් 8 වැනිදා පස්වරු 12.30ට රාජපක්ෂ මහත්මිය නාවලෝක රෝහල වෙත රැගෙන යන ලෙස අධිකරණය බන්ධනාගාර බලධාරීන්ට නියෝග කළේය.
‘සිරිලිය සවිය’ සංවිධානයේ බැංකු ගිණුම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව සිදුකරන විමර්ශනයකට අදාළව ශිරන්ති රාජපක්ෂ මහත්මිය අත්අඩංගුවට ගෙන තිබේ.
