පාර්ලිමේන්තුව විසින් අවශ්ය නීති සම්පාදනය කිරීමෙන් අනතුරුව, හැකි ඉක්මනින් පළාත් සභා මැතිවරණය පැවැත්වීම රජයේ ස්ථාවරය බව කැබිනට් ප්රකාශක අමාත්ය නලින්ද ජයතිස්ස මහතා ප්රකාශ කළේය.
කැබිනට් තීරණ දැනුම්දීම සඳහා පැවති සතිපතා මාධ්ය හමුවේදී අමාත්යවරයා පැවසුවේ පළාත් සභා මැතිවරණය පැවැත්වීම සඳහා අවශ්ය මුදල් දැනටමත් වෙන් කර ඇති බවයි.
අවශ්ය නීති සම්පාදනය සම්බන්ධයෙන් සලකා බලා කෙටුම්පත් කිරීම සඳහා පත්කර ඇති පාර්ලිමේන්තු කමිටුව සිය කාර්යය අවසන් කළ යුතු බවද ඔහු සඳහන් කළේය. රජයට අවශ්ය වන්නේ මැතිවරණය හැකි ඉක්මනින් පැවැත්වීම බවද අමාත්යවරයා අවධාරණය කළේය.
“පළාත් සභා මගින් ක්රියාත්මක කළ යුතු ව්යාපෘති රැසක් තිබෙනවා. මේ වනවිට පළාත් සභා මන්ත්රීවරුන් සහ පළාත් සභා අමාත්යවරුන් විසින් සිදුකළ යුතු කාර්යයන් අදාළ අමාත්යාංශවලට භාරගෙන සිදුකිරීමට සිදුව තිබෙනවා,” යැයි ඔහු පැවසීය.
පළාත් සභා මැතිවරණය සම්බන්ධයෙන් ජාතික ජන බලවේගයේ පාර්ලිමේන්තු මන්ත්රීනි නිලන්ති කොට්ටහච්චි මහත්මිය කළ ප්රකාශයක් පිළිබඳව කළ විමසීමකදී ජයතිස්ස මහතා පැවසුවේ රජය පළාත් සභා මැතිවරණය ප්රමාද නොකරන බවයි. ඇයගේ ප්රකාශය වෙනස් ආකාරයකින් ඉදිරිපත් වී තිබිය හැකි බවද ඔහු සඳහන් කළේය.
කෙසේ වෙතත්, පළාත් සභා මැතිවරණය පැවැත්වීම රජයේ පමණක් වගකීමක් නොවන බව අමාත්යවරයා අවධාරණය කළේය. සියලු දේශපාලන පක්ෂවල එකඟතාව මත මැතිවරණ ක්රියාවලිය ඉදිරියට ගෙන යා යුතු බවද ඔහු පැවසීය.
සීමා නිර්ණය කිරීමේ ක්රියාවලිය සම්බන්ධයෙන් දේශපාලන පක්ෂ අතර විවිධ මත පවතින බව පෙන්වා දුන් අමාත්යවරයා, මැතිවරණය පැවැත්වීමට පෙර එම සියලු කරුණු සැලකිල්ලට ගත යුතු බවද සඳහන් කළේය.
