ශ්රී ලංකා ක්රිකට් ක්රීඩක දිනේෂ් චන්දිමාල් ඉන්දියාවට එරෙහි පළමු ටෙස්ට් තරගයේදී ආබාධයකට ලක්වීමෙන් අනතුරුව පූර්වාරක්ෂක පරීක්ෂණයක් සඳහා රෝහල්ගත කර තිබේ.
සිව්වැනි දිනයේ පළමු සැසියේදී පන්දු රැකීමේ නිරතව සිටියදී හතරේ පහරක් වැළැක්වීමට උත්සාහ කරමින් බිමට පැනීමේදී චන්දිමාල්ගේ දකුණු උරහිස සහ ගෙල ප්රදේශය ආබාධයට ලක්ව ඇත.
සිද්ධියෙන් අනතුරුව ශ්රී ලංකා කණ්ඩායමේ භෞතචිකිත්සකවරයා සහ වෛද්යවරයා විසින් ක්රීඩාංගණයේදීම චන්දිමාල් පරීක්ෂා කර ඇති අතර, වැඩිදුර පරීක්ෂණ සඳහා ඔහු රෝහල වෙත යොමු කර තිබේ.
සිදුකරන ස්කෑන් පරීක්ෂණය පූර්වාරක්ෂක පියවරක් ලෙස සිදුකරන බව සඳහන් වන අතර, එහි ප්රතිඵල ලැබීමෙන් පසු චන්දිමාල්ගේ තත්ත්වය පිළිබඳ වැඩිදුර තොරතුරු නිකුත් කිරීමට නියමිතය.
