නලින් බණ්ඩාර ගෙනා ඩ්‍රෝන 39ක් කටුනායකදී රේගු භාරයට
සමගි ජන බලවේගයේ (SJB) පාර්ලිමේන්තු මන්ත්‍රී නලින් බණ්ඩාර ජයමහ මහතා විසින් සිංගප්පූරුවේ සිට මෙරටට රැගෙන ආ ඩ්‍රෝන (Drones) යානා 39ක තොගයක්, නියමිත නිල අනුමැතීන් ඉදිරිපත් කරන තෙක් ශ්‍රී ලංකා රේගුව විසින් රඳවාගෙන තිබේ.
රේගු මාධ්‍ය ප්‍රකාශක චන්දන පුංචිහේවා මහතා සඳහන් කළේ, ඩ්‍රෝන යානා මෙරටට ආනයනය කිරීම සඳහා අවශ්‍ය වන අනිවාර්ය නියාමන අවසරයන් ඉදිරිපත් කිරීමට අපොහොසත් වීම හේතුවෙන් මෙම පියවර ගත් බවයි.
ඒ අනුව, ආනයන හා අපනයන පාලන දෙපාර්තමේන්තුව, ශ්‍රී ලංකා විදුලි සංදේශ නියාමන කොමිෂන් සභාව (TRC) සහ ආරක්ෂක අමාත්‍යාංශය (MoD) යන ආයතනවලින් අදාළ අනුමැතීන් ලබාගෙන ඉදිරිපත් කරන ලෙස මන්ත්‍රීවරයාට දැනුම් දී ඇත.
අදාළ නීත්‍යානුකූල ලියකියවිලි සහ අනුමැතීන් නිසි පරිදි ඉදිරිපත් කරන තෙක් මෙම ඩ්‍රෝන යානා 39ම රේගු භාරයේ රඳවා තබාගන්නා බව රේගු මාධ්‍ය ප්‍රකාශකවරයා වැඩිදුරටත් තහවුරු කළේය.
