බන්ධනාගාර කොමසාරිස් (මෙහෙයුම් හා මාධ්‍ය) සේනක පල්ලෙතැන්න මහතා ඇතුළු ජ්‍යෙෂ්ඨ බන්ධනාගාර නිලධාරීන් පිරිසක් ඊයේ (16) මහනුවරදී අස්ගිරි සහ මල්වතු පාර්ශ්වයන්හි මහනාහිමිවරුන් බැහැදැක තිබේ.
අස්ගිරි මහා විහාරයේදී පැවති හමුවේදී අස්ගිරි පාර්ශ්වයේ මහනායක අතිපූජ්‍ය වරකාගොඩ ශ්‍රී ඥානරතන හිමියෝ සිරගත කර සිටින ගලගොඩඅත්තේ ඥානසාර හිමියන් නිදහස් කරන ලෙස ඉල්ලීමක් කළහ.
ඥානසාර හිමියන්ට නිදහස ලබාදිය හැකි ක්‍රමවේදයක් තිබේදැයි මහනාහිමියෝ විමසා සිටියහ.
එයට පිළිතුරු දෙමින් බන්ධනාගාර කොමසාරිස් සේනක පල්ලෙතැන්න මහතා සඳහන් කළේ මේ සම්බන්ධයෙන් මෙතෙක් නිශ්චිත තීරණයක් ගෙන නොමැති බවයි.
එම හමුවෙන් අනතුරුව බන්ධනාගාර කොමසාරිස්වරයා මල්වතු මහා විහාරයට ගොස් මල්වතු පාර්ශ්වයේ මහනායක අතිපූජ්‍ය තිබ්බටුවාවේ ශ්‍රී සුමංගල හිමියන් බැහැදැක තිබේ.
එහිදී පැවති සාකච්ඡාවේදී අපරාධ චෝදනා සම්බන්ධයෙන් රක්ෂිත බන්ධනාගාරගත කරනු ලබන හෝ සිරගත කරනු ලබන බෞද්ධ භික්ෂූන් වහන්සේලා සඳහා වෙනම රැඳවුම් පහසුකම් ස්ථාපිත කිරීමේ අවශ්‍යතාව මල්වතු මහනාහිමියෝ අවධාරණය කළහ.
මේ සම්බන්ධයෙන් මීට පෙරද සාකච්ඡා පවත්වා තිබුණද, ඒවා නිශ්චිත තීරණයකින් තොරව අවසන් වූ බව උන්වහන්සේ පෙන්වා දුන්හ.
අත්අඩංගුවේ පසුවන භික්ෂූන් වහන්සේලාට ආගමික කටයුතුවල නිරත වීම සඳහා සීමා රහිත අවස්ථාව ලබාදෙන වෙනම ස්ථානයක ඔවුන් රඳවා තැබිය යුතු බවද මහනාහිමියෝ අවධාරණය කළහ.
එමෙන්ම සිරගත කර සිටින බෞද්ධ භික්ෂූන් වහන්සේලාට නිසි ලෙස සහ ගෞරවාන්විතව සැලකීම සහතික කිරීමේ වැදගත්කමද උන්වහන්සේ පෙන්වා දුන්හ.
