කැනේඩියානු සමාගමක් සමඟ ඇතිවූ ආරවුලකට අදාළ සුඛෝපභෝගී මෝටර් රථ දෙකක් ඉවත් කිරීම, විදේශගත කිරීම, විකිණීම හෝ තවදුරටත් වෙනස් කිරීම වළක්වමින් ආයෝජන මණ්ඩලයේ (BOI) අනුමැතිය ලත් සමාගමකට එරෙහිව අභියාචනාධිකරණය අතුරු නියෝගයක් නිකුත් කර තිබේ.
විනිසුරුවරුන් වන ආර්. ගුරුසිංහ සහ ඒ. ප්රේමශංකර් යන මහත්වරුන්ගෙන් සමන්විත විනිසුරු මඩුල්ලක් විසින් අගෝස්තු 7 වැනිදා මෙම නියෝගය නිකුත් කර ඇත.
කැනඩාවේ පදනම් වූ Atlantic Auto Performance Ltd. සමාගම විසින් හදිසි අවස්ථාවක් ලෙස ඉදිරිපත් කළ පෙත්සමක් සලකා බැලීමට අවසර ලබාදීමෙන් අනතුරුව මෙම නියෝගය නිකුත් කර තිබේ.
ඇමරිකානු සහ අනෙකුත් ඉහළ පෙළේ මෝටර් රථ ජාත්යන්තර වෙළෙඳපොළට අපනයනය කරන Atlantic Auto සමාගම, වම්පස රියදුරු සහිත මෝටර් රථ දකුණුපස රියදුරු සහිත මෝටර් රථ බවට පරිවර්තනය කිරීම සඳහා මීට පෙර BOI අනුමැතිය ලත් සමාගම වෙත මෝටර් රථ යවා තිබූ බව අධිකරණයට දැනුම් දී ඇත.
මෙම ආරවුලට අදාළව ඇත්තේ 2024 වසරේ නිෂ්පාදිත Lincoln Navigator L Black Label වර්ගයේ සුඛෝපභෝගී මෝටර් රථ දෙකක් වන අතර, ඒවායේ වටිනාකම ඇමරිකානු ඩොලර් 260,000ක් පමණ වන බව පෙත්සමේ සඳහන් වේ.
පෙත්සම්කාර සමාගම පවසන්නේ මූලික ගෙවීමක් සිදුකර මෝටර් රථ දෙක ශ්රී ලංකාවට එවූයේ කොළඹ වරායෙන් ඒවා නිදහස් කිරීමට පෙර ඉතිරි මුදල ගෙවීමේ එකඟතාව මත බවයි.
කෙසේ වෙතත්, තම අනුමැතියකින් තොරව සහ ඉතිරි මුදල ගෙවීමකින් තොරව මෝටර් රථ නිදහස් කර පසුව ඒවා පරිවර්තනය කර ඇති බවත්, එය වංචාවක් බවත් Atlantic Auto සමාගම චෝදනා කර තිබේ.
මෝටර් රථ BOI සමාගමක් සතුව පැවතීම හේතුවෙන් අදාළ BOI නීති යටතේ පළමු අවස්ථාවේ අධිකරණයකට නඩුවක් විභාග කිරීමකින් තොරව වාරණ නියෝගයක් ලබාදීම සම්බන්ධයෙන් සීමාවන් පවතින බැවින්, අභියාචනාධිකරණයෙන් සහනයක් ඉල්ලා සිටි බවද සමාගම අධිකරණයට දන්වා ඇත.
ප්රමාදයක් සිදුවුවහොත් මෝටර් රථ දෙක ශ්රී ලංකාවෙන් වෙනත් රටකට යැවීමේ හැකියාවක් පවතින බවත්, තම ප්රධාන විධායක නිලධාරීවරයා සහ අධ්යක්ෂවරයෙකු මේ වනවිට ශ්රී ලංකාවට පැමිණ ඇති බවත්, මෝටර් රථ ඉවත් කිරීමේ අවදානම ඉතා ආසන්න බවත් සමාගම අධිකරණයට පෙන්වා දී තිබේ.
පෙත්සම, සාක්ෂි සහ දෙපාර්ශ්වයේ කරුණු සලකා බැලූ අභියාචනාධිකරණය වගඋත්තරකරුවන් වෙත නොතිසි නිකුත් කරමින්, 2026 අගෝස්තු 19 වැනිදා දක්වා බලපැවැත්වෙන අතුරු නියෝගයක් නිකුත් කළේය.
ඒ අනුව, අදාළ සමාගමට හෝ එහි නියෝග මත ක්රියාකරන කිසිදු පුද්ගලයෙකුට මෝටර් රථ දෙක ඉවත් කිරීම, අපනයනය කිරීම, නැව්ගත කිරීම, ප්රවාහනය කිරීම, විකිණීම, පැවරීම හෝ ඒවායේ භාරය හෝ පාලනය වෙනත් පාර්ශ්වයකට ලබාදීම තහනම් කර තිබේ.
එමෙන්ම, මෝටර් රථ දෙක තවදුරටත් ගලවා දැමීම, පරිවර්තනය කිරීම, වෙනස් කිරීම හෝ කිසියම් ආකාරයකින් සංශෝධනය කිරීම මෙන්ම ඒවායේ කොටස් හෝ උපාංග බැහැර කිරීමද අධිකරණය තහනම් කර ඇත.
Atlantic Auto සමාගම වෙනුවෙන් ජනාධිපති නීතිඥ නිශාන් සිඩ්නි ප්රේමතිරත්න මහතා, නීතිඥවරුන් වන සෂීන් අරෙසෙකියුලරත්න, ෂෙනාලි ඩයස් සහ සිදත් ගජනායක යන මහත්ම මහත්මීන් සමඟ පෙනී සිටි අතර, චානුක ඒකනායක මහතා උපදෙස් ලබා දී තිබේ.
