රටේ උසස් තාක්ෂණික කුසලතා වර්ධනය කිරීම සහ තොරතුරු තාක්ෂණ ක්ෂේත්‍රයේ පවතින රැකියා ගැටලුවලට විසඳුම් සෙවීමේ ප්‍රයත්නයේ කොටසක් ලෙස යෝජිත මධ්‍යස්ථානය සඳහා ලබන සතියේදී කැබිනට් අනුමැතිය ලබා ගැනීමට රජය අපේක්ෂා කරන බව ජනාධිපතිවරයා පැවසීය.
සෑම වසරකම රාජ්‍ය හා පෞද්ගලික විශ්වවිද්‍යාලවලින් සිසුන් 17,000ක් පමණ තොරතුරු තාක්ෂණ ක්ෂේත්‍රයට එක් වුවද, එම උපාධිධාරීන්ට සුදුසු රැකියා අවස්ථා ප්‍රමාණවත් නොවීමේ ගැටලුවට ශ්‍රී ලංකාව මුහුණ දී සිටින බව ඔහු පිළිගත්තේය.
තාක්ෂණික කර්මාන්තයේ අනාගතය සම්බන්ධයෙන් යොමු කළ ප්‍රශ්නයකට පිළිතුරු දෙමින් ජනාධිපතිවරයා සඳහන් කළේ, වර්තමානයේ ප්‍රධාන අභියෝගය ශ්‍රමිකයන්ගේ හිඟයක් නොව උපාධිධාරීන් සතු කුසලතාවල මට්ටම බවයි.
බොහෝ උපාධිධාරීන් සතුව දැනට පවතින්නේ මධ්‍යම මට්ටමේ කුසලතා වන අතර, රැකියා අවස්ථා වැඩි වශයෙන් නිර්මාණය වෙමින් පවතින්නේ වඩාත් උසස් තාක්ෂණික ක්ෂේත්‍රවල බවද ඔහු පෙන්වා දුන්නේය.
කෘත්‍රිම බුද්ධිය, විශාල දත්ත විශ්ලේෂණය (Big Data), ක්වොන්ටම් පරිගණනය සහ බ්ලොක්චේන් තාක්ෂණය වැනි ක්ෂේත්‍රවල කර්මාන්ත අවශ්‍යතා වෙනස් වෙමින් පවතින බැවින්, ඊට ගැළපෙන ලෙස මෙරට තොරතුරු තාක්ෂණ අධ්‍යාපන හා පුහුණු පද්ධති වැඩිදියුණු කළ යුතු බව ජනාධිපතිවරයා පැවසීය.
ව්‍යාපාර ක්‍රියාවලි බාහිරින් ලබාගැනීමේ (BPO) සමාගම් සහ දුරස්ථ රැකියා අවස්ථා හරහා ජාත්‍යන්තර රැකියා වෙළෙඳපොළට පිවිසීමේ අවස්ථා පුළුල් කිරීමටද සැලසුම් කර ඇති බව ඔහු සඳහන් කළේය.
වේගයෙන් සංවර්ධනය වන ගෝලීය තොරතුරු තාක්ෂණ කර්මාන්තයට අවශ්‍ය උසස් තාක්ෂණික කුසලතාවලින් යුත් උපාධිධාරීන් බිහි කිරීම සඳහා විශ්වවිද්‍යාල උපාධි පාඨමාලාද කාලීන අවශ්‍යතාවලට අනුව වෙනස් විය යුතු බව ජනාධිපතිවරයා පෙන්වා දුන්නේය.
මෙරට තොරතුරු තාක්ෂණ ක්ෂේත්‍රය ඉහළ වටිනාකමක් සහිත උසස් තාක්ෂණික ක්ෂේත්‍ර වෙත යොමු කිරීම උපාධිධාරීන් මුහුණ දෙන රැකියා ගැටලුවලට විසඳුම් සෙවීම සඳහා අත්‍යවශ්‍ය වනු ඇතැයිද ඔහු අවධාරණය කළේය.
