ආනයනික රූපලාවණ්ය ද්රව්ය සහ පාවහන් සම්බන්ධයෙන් දිවයින පුරා සිදුකළ වැටලීම් 108කදී රුපියල් මිලියන 1.5කට ආසන්න වටිනාකමකින් යුත් භාණ්ඩ පාරිභෝගික කටයුතු පිළිබඳ අධිකාරිය භාරයට ගෙන තිබේ.
පාරිභෝගික කටයුතු පිළිබඳ අධිකාරිය සඳහන් කළේ අගෝස්තු 18 සහ 19 යන දෙදින තුළ සිදුකළ විශේෂ වැටලීම් හා වෙළෙඳපොළ විමර්ශන වැඩසටහනේදී ව්යාපාරික ස්ථාන 84කට එම භාණ්ඩ ලබාගත් ආකාරය තහවුරු කිරීම සඳහා අවශ්ය රිසිට්පත්, බිල්පත් හෝ ඉන්වොයිසි ඉදිරිපත් කිරීමට නොහැකි වූ බවයි.
ආනයනික සම පැහැපත් කිරීමේ ක්රීම්, මුහුණ සහ ශරීරය සඳහා භාවිත කරන රූපලාවණ්ය ද්රව්ය, සුවඳ විලවුන්, හිසකෙස් සත්කාරක නිෂ්පාදන, ක්රීඩා පාවහන් සහ අනෙකුත් ආනයනික පාවහන් සම්බන්ධයෙන් මෙම පරීක්ෂණ සිදුකර තිබේ.
සමහර ව්යාපාරික ස්ථාන සතුව බිල්පත් හෝ ඉන්වොයිසි නොතිබීම, සැපයුම්කරුවන් හඳුනාගත නොහැකි වීම සහ අදාළ නිෂ්පාදන සිල්ලර වෙළෙඳ සැපයුම් දාමයට ඇතුළු වූ ආකාරය තහවුරු කරගත නොහැකි වීම ඇතුළු කරුණු නිලධාරීන් විසින් අනාවරණය කරගෙන තිබේ.
ඇස්තමේන්තුගත වෙළෙඳපොළ වටිනාකම රුපියල් මිලියන 1.5කට ආසන්න භාණ්ඩ පාරිභෝගික කටයුතු පිළිබඳ අධිකාරියේ නිලධාරීන් භාරයට ගෙන ඇති අතර, අදාළ වෙළෙඳුන්ට එරෙහිව නීතිමය ක්රියාමාර්ග ගැනීමට කටයුතු කරමින් පවතී.
භාණ්ඩවල මූලාශ්රය තහවුරු කරගත නොහැකි වූ අවස්ථාවලදී ඒවාට සම්බන්ධ සැපයුම්කරුවන්, බෙදාහරින්නන් සහ අනෙකුත් පාර්ශ්ව හඳුනාගැනීම සඳහා වැඩිදුර විමර්ශන සිදුකරන ලෙසද නියෝග කර තිබේ.
2026 වසර තුළ මේ දක්වා ක්රීම් සහ දියර වර්ග සම්බන්ධයෙන් පමණක් වැටලීම් 785ක් පමණ සිදුකර ඇති අතර, අදාළ ව්යාපාරික ස්ථානවලට එරෙහිව නීතිමය ක්රියාමාර්ග ගෙන ඇති බවද අධිකාරිය සඳහන් කළේය.
පාරිභෝගික කටයුතු පිළිබඳ අධිකාරියේ අංක 83 දරන නියෝගය යටතේ නිෂ්පාදකයන්, සැපයුම්කරුවන්, බෙදාහරින්නන්, ගබඩා හිමියන් සහ වෙළෙඳුන් තමන් සතුව ඇති භාණ්ඩ ලබාගත් ආකාරය තහවුරු කරන ලේඛන පවත්වාගෙන යාම අනිවාර්ය වේ.
භාණ්ඩවල මූලාශ්රය පහසුවෙන් සොයාගත හැකි බව තහවුරු කිරීම, පාරිභෝගිකයන් ආරක්ෂා කිරීම සහ නීත්යානුකූලව ව්යාපාර පවත්වාගෙන යන වෙළෙඳුන් සඳහා සාධාරණ තරගකාරීත්වයක් පවත්වාගෙන යාම මෙම නියෝගයේ අරමුණ බව අධිකාරිය පැවසීය.
ආනයනික රූපලාවණ්ය ද්රව්ය, පාවහන් සහ තෝරාගත් අනෙකුත් නිෂ්පාදන සම්බන්ධ විශේෂ වැටලීම් සහ වෙළෙඳපොළ විමර්ශන දිවයින පුරා අඛණ්ඩව සිදුකරන බවද පාරිභෝගික කටයුතු පිළිබඳ අධිකාරිය වැඩිදුරටත් සඳහන් කළේය.
