Sunday, 22 November 2026

ශ්‍රී ලංකාවේ උණුසුම් පුවත් විමසුම

GTA 6 පිටපත් මිලියන 24.5 ක් අලෙවි වෙයි

බෙදාගන්න
XWhatsAppTelegramඅදහස්

වසර 13 ක දීර්ඝ බලා සිටීමකින් අනතුරුව බ්‍රහස්පතින්දා (නොවැම්බර් 19) නිකුත් කෙරුණු ‘Grand Theft Auto 6’ (GTA 6) වීඩියෝ ක්‍රීඩාව ඉතිහාසයේ විශාලතම විනෝදාස්වාද නිකුතුව බවට පත්ව ඇතැයි ඇස්තමේන්තු කර තිබේ.

විශ්ලේෂණ ආයතනයක් වන ‘සෙන්සර් ටවර්’ (Sensor Tower) වාර්තාවලට අනුව, අතිශය අපේක්ෂාවෙන් සිටි මෙම ක්‍රීඩාවේ පෙර-ඇණවුම් සහ පළමු දින අලෙවිය පිටපත් මිලියන 24.5 ඉක්මවා ඇති අතර, එමගින් උපයා ඇති ආදායම ඇමරිකානු ඩොලර් බිලියන 2.36 ක් (බ්‍රිතාන්‍ය පවුම් බිලියන 1.8 ක්) පමණ වේ.

සැසඳීමක් ලෙස ගතහොත්, මෙම වසරේ මෙතෙක් වැඩිම ආදායමක් ඉපයූ චිත්‍රපටය වන Spider-Man: Brand New Day චිත්‍රපටය සිය සම්පූර්ණ සිනමා ශාලා ප්‍රදර්ශන කාලය තුළදී උපයාගෙන ඇත්තේ ඩොලර් බිලියන 2.5 කි.

GTA 6 නිර්මාණය කළ ‘රොක්ස්ටාර්’ (Rockstar) ආයතනය සහ එහි මව් සමාගම වන ‘ටේක්-ටූ’ (Take-Two) අලෙවි සංඛ්‍යාලේඛන මෙතෙක් නිල වශයෙන් ප්‍රකාශයට පත් කර නොමැති නමුත්, ක්‍රීඩාව සඳහා පවතින ඉල්ලුම “පෙර නොවූ විරූ” මට්ටමක පවතින බව ප්‍රකාශ කර ඇත.

ඩොලර් බිලියනයක නිෂ්පාදන පිරිවැයක්

දශක තුනකට ආසන්න ඉතිහාසයක් ඇති රොක්ස්ටාර් සමාගමේ ජනප්‍රිය අපරාධ අනුකරණ ක්‍රීඩා මාලාවේ නවතම කොටස වන මෙය, ඇමරිකානු සිහිනය උපහාසයට ලක් කරමින් ෆ්ලොරිඩා ප්‍රාන්තය ඇසුරින් නිර්මාණය කළ ‘ලියොනිඩා’ (Leonida) ප්‍රාන්තයේ අපරාධකරුවන්ගේ භූමිකාවට ක්‍රීඩකයින් රැගෙන යයි. මෙවර නිකුතුව ලුසියා (Lucia) සහ ඇගේ සහකරු ජේසන් (Jason) නමැති කුඩා පරිමාණ අපරාධකරුවන් යුවළක් වටා ගෙතී ඇත.

GTA 6 සංවර්ධනය කිරීම සඳහා ඩොලර් බිලියනයකට වඩා වැඩි මුදලක් වැය වී ඇතැයි ඇස්තමේන්තු කර ඇති අතර, එය ඉතිහාසයේ මිල අධිකම වීඩියෝ ක්‍රීඩාව බවට පත්වනු ඇත.

වෙළෙඳපොළ දත්ත සහ ඉදිරි ආදායම් අපේක්ෂා

GTA 6 ක්‍රීඩාව කෙතරම් ජනප්‍රිය වනු ඇත්ද යත්, එමගින් ක්‍රීඩකයින් වෙනත් තනි-ක්‍රීඩක (Single-player) ක්‍රීඩා සඳහා වැය කරන කාලය 10% කින් අඩු වනු ඇතැයි සෙන්සර් ටවර් ආයතනය පවසයි. දිනපතා මිලියන ගණනක් පුද්ගලයින්ගේ ඊමේල් රිසිට්පත් දත්ත සහ PlayStation හා Xbox වැනි ප්‍රධාන ක්‍රීඩා වේදිකාවල පොදු දත්ත මත පදනම්ව මෙම ඇස්තමේන්තු සකස් කර ඇත.

සමස්ත අලෙවියෙන් හතරෙන් තුනක් පමණ PlayStation 5 සඳහාත් ඉතිරිය Xbox සඳහාත් සිදුව ඇති බව සෙන්සර් ටවර් සඳහන් කරයි. ක්‍රීඩා වෙළෙඳපොළ පර්යේෂණ ආයතනයක් වන ‘නිකෝ පාර්ට්නර්ස්’ (Niko Partners) අපේක්ෂා කරන්නේ GTA 6 මේ වසරේදී ලොව පුරා ඩොලර් බිලියන 3 කට වැඩි අලෙවියක් වාර්තා කරනු ඇති බවයි. එම අගය මෙතෙක් බිහිවූ ඉහළම ආදායම් ලැබූ විනෝදාස්වාද නිකුතු අතරට එක්වුවද, උද්ධමනයට ගැළපූ විට ඩොලර් බිලියන 4.5 ක ආදායමක් උපයා ඇති 1939 වසරේ Gone with the Wind චිත්‍රපටය අභිබවා යාමට තවත් දුර යා යුතුව ඇත.

නිව්යෝර්ක් නුවර පිහිටි රොක්ස්ටාර් ස්ටුඩියෝ ආයතනය මෙම ක්‍රීඩාව පරිගණක (PC) සඳහා නිකුත් කරන දිනය හෝ බහු-ක්‍රීඩක (Multiplayer) විශේෂාංගය හඳුන්වා දෙන දිනය මෙතෙක් ප්‍රකාශයට පත් කර නොමැත. 2013 වසරේ නිකුත් වූ GTA 5 මෙන්, බහු-ක්‍රීඩක අංගය මගින් ක්‍රීඩාවට තවත් පැය දුසිම් ගණනක් එක් කරන අතරම ක්‍රීඩකයින් ක්‍රීඩාව තුළ දේපළ, මෝටර් රථ සහ වෙනත් වරප්‍රසාද සඳහා සැබෑ මුදල් වැය කිරීම හරහා රොක්ස්ටාර් ආයතනයට අතිවිශාල ආදායමක් ගෙන දෙනු ඇතැයි අපේක්ෂා කෙරේ.

අන්තර්ජාල තදබදය සහ වාරණ

විනෝදාස්වාද මාධ්‍ය වෙබ් අඩවියක් වන IGN විසින් මෙම ක්‍රීඩාව විශිෂ්ට නිර්මාණයක් ලෙස හඳුන්වා දී ඇති අතර, බ්‍රහස්පතින්දා මධ්‍යම රාත්‍රියේ ක්‍රීඩාව නිකුත් වීමත් සමඟ බොහෝ ක්‍රීඩකයින් රැය පහන් වන තුරු අවදියෙන් සිට ඇති අතර ඇතැමුන් පසුදා නිවාඩු ලබාගෙන ඇති බව ද වාර්තා වේ. ක්‍රීඩාවේ ගිගාබයිට් 212 (212GB) ක දැවැන්ත ගොනුව බාගත කිරීමට පිරිස් උත්සාහ කිරීමත් සමඟ ‘වර්ජින් මීඩියා O2’ (Virgin Media O2) ආයතනයේ සැන්දෑ කාලයේ අන්තර්ජාල දත්ත තදබද වාර්තා ද බිඳ වැටී ඇත.

කෙසේ වෙතත්, ක්‍රීඩාවේ අඩංගු දර්ශන හේතුවෙන් ජපානයේදී එය වාරණයට ලක්ව ඇති අතර, පෙර GTA නිකුතු මෙන්ම චීනයේ ප්‍රධාන භූමිය තුළ අලෙවි කිරීම සඳහා ද මෙතෙක් අනුමැතිය හිමිව නොමැත.

ඔබේ අදහස