ආචාර්ය හර්ෂ ද සිල්වා මහතාගේ සභාපතිත්වයෙන් යුත් පාර්ලිමේන්තු රජයේ මුදල් පිළිබඳ කාරක සභාව (COPF) විසින් 2027 මුදල් වර්ෂය සඳහා වන විසර්ජන පනත් කෙටුම්පත නිල වශයෙන් අනුමත කර ඇති අතර, ඒ අනුව එය පාර්ලිමේන්තුවට ඉදිරිපත් කිරීමට අවශ්‍ය මාර්ගය විවර වී තිබේ.
රාජ්‍ය ආදායම්, වියදම් කළමනාකරණය සහ ප්‍රමුඛ සංවර්ධන ව්‍යාපෘති ඇතුළත් අයවැය ඇස්තමේන්තු පිළිබඳව මුදල්, ක්‍රමසම්පාදන සහ ආර්ථික සංවර්ධන අමාත්‍යාංශයේ ජ්‍යෙෂ්ඨ නිලධාරීන් සමඟ පසුගිය ඔක්තෝබර් 22 වැනිදා පැවති විශේෂ සාකච්ඡාවේදී මෙම කෙටුම්පත අවසන් වශයෙන් සමාලෝචනය කර අනුමත කරන ලදී.
මෙහිදී මුදල් අමාත්‍යාංශයේ උසස් නිලධාරීන් විසින් 2027 රජයේ වියදම් ඇස්තමේන්තු, ප්‍රාග්ධන වෙන්කිරීම් ඉලක්ක, රාජ්‍ය ආදායම් පුරෝකථන මෙන්ම ණය සේවාකරණ වගකීම් පිළිබඳව සවිස්තරාත්මක ඉදිරිපත් කිරීමක් සිදුකරන ලදී.
යටිතල පහසුකම් සහ ප්‍රාග්ධන වියදම්
කාරක සභාවේ මූලික අවධානයක් යොමුවූයේ 2027 වසරේ ප්‍රාග්ධන වියදම් වෙන්කිරීම් හරහා ප්‍රධාන යටිතල පහසුකම් ව්‍යාපෘති සඳහා ප්‍රමුඛත්වය ලබාදීම කෙරෙහිය. දිවයින පුරා මහාමාර්ග සංවර්ධනය, සෞඛ්‍ය හා අධ්‍යාපන පහසුකම්වල කැපී පෙනෙන සංවර්ධනයක් ඇතිකිරීම, ජාතික විදුලිබල පද්ධතිය පුළුල් කිරීම මෙන්ම නාගරික සංවර්ධන මුලපිරීම් රැසක් මීට ඇතුළත් වේ.
මීට අමතරව, සාර්ව ආර්ථික පුරෝකථන, රාජ්‍ය මූල්‍ය කළමනාකරණ රාමුව, රාජ්‍ය සේවක වැටුප් හා විශ්‍රාම වැටුප් ගෙවීම් මෙන්ම අත්‍යවශ්‍ය මහජන සේවාවන් පවත්වාගෙන යාම සඳහා වන වියදම් පිළිබඳවද කාරක සභාව දැඩි ලෙස කරුණු විමර්ශනය කළේය.
සුළු හා මධ්‍ය පරිමාණ ව්‍යාපාර සහ විදේශ ණය
යටිතල පහසුකම් සංවර්ධනයට අමතරව, සුළු හා මධ්‍ය පරිමාණ ව්‍යවසායන් (SMEs) සඳහා මූල්‍ය ආධාර ලබාදීමේ උපායමාර්ග, ණය ඇපකර යෝජනාක්‍රම (Credit guarantee schemes) සහ සමස්ත ව්‍යාපාරික ක්ෂේත්‍රය නඟාසිටුවීමේ සහන වැඩසටහන් පිළිබඳවද මෙහිදී අවධානය යොමුවිය.
එමෙන්ම 2027 වසරේ විදේශ ණය සේවාකරණ අවශ්‍යතා, අපේක්ෂිත විදේශ මූල්‍ය ගලාඒම් සහ විස්තීර්ණ රාජ්‍ය ණය කළමනාකරණ වැඩපිළිවෙළ පිළිබඳවද අමාත්‍යාංශ නිලධාරීන් විසින් කාරක සභාව දැනුවත් කරන ලදී. ප්‍රධාන ආදායම් ඉලක්ක සපුරාගැනීම, බදු පරිපාලනයේ කාර්යක්ෂමතාව ඉහළ නැංවීම සහ සියලු අයවැය ප්‍රතිපාදන ඵලදායී ලෙස භාවිත කිරීම සහතික කිරීමේ උපායමාර්ගද මෙහිදී ගැඹුරින් සාකච්ඡාවට ලක්විය.
මෙම ඉහළ පෙළේ කාරක සභා රැස්වීමට නියෝජ්‍ය අමාත්‍ය නිශාන්ත ජයවීර, වෛද්‍ය කෞෂල්‍යා ආරියරත්න මෙන්ම පාර්ලිමේන්තු මන්ත්‍රීවරුන් වන රවී කරුණානායක, හර්ෂණ රාජකරුණා, අජිත් අගලකඩ, නිමල් පලිහේන, විජේසිරි බාස්නායක, තිලින සමරකෝන් සහ නීතිඥ චිත්‍රල් ප්‍රනාන්දු, නීතිඥ ලක්මාලි හේමචන්ද්‍ර යන මහත්ම මහත්මීහු ඇතුළු පිරිසක් සහභාගී වූහ.
