ඉදිරියේදී ශ්රී ලාංකිකයන්ට තමන් කැමති වාහන නිදහසේ මිලදී ගෙන භාවිත කිරීමට හැකි පරිසරයක් නිර්මාණය කරන බව විදේශ කටයුතු අමාත්ය විජිත හේරත් මහතා පවසයි.
රජය වාහන ආනයනය සඳහා පනවා තිබූ සීමා ක්රමයෙන් ලිහිල් කරමින් සිටින බවද අමාත්යවරයා සඳහන් කළේය.
ඉරිදා ශ්රී ලංකා වාහන ආනයනකරුවන්ගේ සංගමය (CAIA) විසින් සංවිධාන කළ “Motor Rally 2026” වාහන ප්රදර්ශන පෙළපාළියේ ප්රධාන ආරාධිතයා ලෙස සහභාගි වෙමින් අමාත්යවරයා මේ බව පැවසීය.
ජනතාවට තමන්ගේම වාහනවලින් පහසුවෙන් ගමන් කිරීමටත්, දෛනික අවශ්යතා පහසුවෙන් ඉටු කර ගැනීමටත් හැකි රටක් නිර්මාණය කිරීම රජයේ අරමුණක් බව ඔහු අවධාරණය කළේය.
මීට වසර දෙකකට පමණ පෙර ශ්රී ලංකාව තුළ වාහන ආනයනය සම්පූර්ණයෙන්ම අත්හිටුවා තිබූ බව සිහිපත් කළ අමාත්ය හේරත් මහතා, එම තත්ත්වය වෙනස් කර කෙටි කාලයක් තුළ නැවත වාහන ආනයනය කිරීමට රජයට හැකි වූ බව පැවසීය.
අද වන විට සීමා සහිත ක්රමවේදයක් යටතේ වුවද ඕනෑම වර්ගයක වාහනයක් මෙරටට ආනයනය කිරීමට අවස්ථාව උදා වී ඇති බවද ඔහු සඳහන් කළේය.
කෙසේ වෙතත්, මැදපෙරදිග පවතින ගැටුම්කාරී තත්ත්වය හේතුවෙන් වර්තමානයේ යම් සීමාවන් පැනවී ඇති බවත්, ඒවා තාවකාලික සීමාවන් වන අතර ඉදිරියේදී ඉවත් කෙරෙනු ඇති බවත් අමාත්යවරයා පැවසීය.
සීමා සහිත ක්රමවේදයක් යටතේ වුවද වාහන ආනයනය නැවත ආරම්භ කිරීමට හැකි වූයේ රටේ ආර්ථිකය ශක්තිමත් කිරීමට රජයට හැකි වූ නිසා බවද ඔහු පෙන්වා දුන්නේය.
“ඔබගේ සහයෝගය සමඟ අපි ආර්ථිකය ශක්තිමත් කර ඇති අතර එය තවදුරටත් ඉදිරියට ගෙන යමින් සිටිනවා. ඒ අනුව, නුදුරු අනාගතයේදී ජනතාවට තමන් කැමති වාහනය භාවිත කිරීමට හැකි වේවි.”
ජනතාවට සතුටින් ජීවත් වීමට සහ නිදහසේ ගමන් කිරීමට අවශ්ය පරිසරය නිර්මාණය කිරීම සඳහා තවදුරටත් පුළුල් ප්රතිසංස්කරණ සිදුකළ යුතු බවද අමාත්යවරයා සඳහන් කළේය. ඒ සඳහා රජය කැපවී සිටින බවද ඔහු අවධාරණය කළේය.
