සංචාර වීසා යොදා ගනිමින් විදේශ රැකියා ජාවාරම් සිදුකරන මාෆියාවට එරෙහිව දැඩි පියවර ගන්නා ලෙස විදේශ රැකියා අමාත්‍ය මනූෂ නානායක්කාර අදාළ අංශවලට උපදෙස් ලබාදී තිබෙනවා.
අමාත්‍යවරයා කියා සිටියේ සංචාරක වීසා මගින් පුද්ගලයින් විදේශ රැකියා සඳහා යැවීමේ මාෆියාවක් ක්‍රියාත්මක වන බවයි.
මෙම මිනිස් ජාවාරමට සම්බන්ධ පුද්ගලයන්ට සහ සංවිධානවලට එරෙහිව දැඩි නීතිමය පියවර ගන්නා බවද ඔහු අනතුරු ඇඟවීය.
ගුවන් තොටුපළ, ආගමන විගමන දෙපාර්තමේන්තුව, ශ්‍රී ලංකා විදේශ සේවා නියුක්ති කාර්යාංශය සහ අපරාධ පරීක්ෂණ දෙපාර්තමේන්තුව වැනි ආයතනවල බලධාරීන් මෙවැනි වංචාවන් පිළිබඳ අධීක්‍ෂණය කරමින් සිටින බව අමාත්‍ය නානායක්කාර මහතා පැවසීය.
ගුවන් තොටුපළ සේවා, ආගමන විගමන, සහ ශ්‍රී ලංකා විදේශ සේවා නියුක්ති කාර්යාංශයේ (SLBFE) නිලධාරීන් සමඟ අද පැවති සාකච්ඡාවකදී ඔහු මේ බව ප්‍රකාශ කළේය.
ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි වී නොමැති පුද්ගලයින් සහ සංවිධාන මෙම රැකියා මාෆියාව පවත්වාගෙන යන බව පවසමින් ඔහු රටේ තරුණ තරුණියන්ගෙන් ඉල්ලා සිටියේ ලියාපදිංචි වී නොමැති සංවිධාන සහ පුද්ගලයින් හරහා රැකියා සොයා ගැනීම සඳහා සංචාරය වීසා මත විදෙස් ගත නොවන ලෙසයි.
